Sipas të dhënave të KLSH dhe raporteve ndërkombëtare, pushtetarët në Shqipëri vjedhin miliona euro çdo vit nga buxheti i shtetit, ndërsa miliona të tjera burojnë nga ryshfeti, skemat e korrupsionit, lidhjet me krimin etj. Megjithatë, është një zyrtar i rangut të lartë i cili nuk është dënuar deri më sot. Por, kësaj kulture duket se po i vjen fundi.
Gazeta “Sot”, shkruan se një grup prokurorësh janë angazhuar për hapjen dhe verifikimin e disa dosjeve të pasurisë, për llogari të disa ishministrave, ishdeputetëve dhe deputetëve. Sipas burimeve, Prokuroria ka nisur hetimet intensive, pas disa kallëzimeve penale të ILDKP për fshehje pasurie, pastrim parash dhe falsifikim dokumentesh.
Mësohet se grupi i prokurorëve janë fokusuar tek dosjet e disa zyrtarëve dhe ishzyrtarëve të lartë, të cilët sipas ILDKP, brenda dhe jashtë vendit, kanë fshehur miliona euro. Konkretisht objekt i hetimeve janë tre deputetë të Kuvendit të Shqipërisë, dy ishministra të qeverisë “Berisha” dhe një ish-drejtor i rëndësishëm.
Sipas gazetës “Sot” më sitë të prokurorisë po kalojnë një sërë zyrtarësh të nivelit të lartë, të cilët janë kapur me shkelje nga Inspektorati i Lartë i Deklarimit dhe Kontrollit të Pasurive. Mësohet se hetimet ndaj tyre janë thelluar, kjo pasi bëhet fjalë për shuma të mëdha parash, ndërkohë që disa prej tyre dyshohet se kanë bërë dhe pastrim parash.
Qysh me marrjen e pushtetit në vitin 2013, mazhoranca por edhe organet e pavarura të drejtësisë kanë qenë nën presiopnin e vazhdueshëm të ndërkombëtarëve dhe qytetarëve vendas duke kërkuar që kultura e mosndëshkimit të marrë fund.
