Fatos Klosi jo vetem qe nuk ka asnje besim te Lulzim Basha per ato qe thote, por dhe denon fort rrjedhjen e informacionit nga ana e SHISH, duke dekonspiruar aksionin per kapjen e eurove qe po hynin ne Shqiperi.
Nderkohe klima politike në Shqipëri është e tensionuar që pas kapjes së 3.4 milionë eurove në Portin e Durrësit në një makinë të tipit “Toyota Yaris”. Që në seancën plenare të së enjtes së kaluar kreu demokrat, Lulzim Basha akuzoi Sekretarin e Përgjithshëm të Partisë Socialiste se gjermanët i kishin zbuluar 1.5 milionë eurot e drogës të fshehura në “Toyota Yaris”. Ndërkohë, sulme të tilla vijuan edhe pas aksionit policor.
Por për ish-kreun e Shërbimit Informativ Shtetëror, Fatos Klosi akuzave të hedhura nga Partia Demokratike nuk mund t’iu besohet. Gjatë një prononcimi për gazetën “SOT”, ai u shpreh se duke marrë shkas edhe nga “skandalet” e mëparshme që kanë publikuar demokratët, nuk mund të jetë habi që edhe kjo histori të jetë e stisur.
“Nuk i komentoj dot sepse nuk dimë akoma asgjë. Ne dimë që janë arrestuar ata që konsiderohen si përgjegjës për këtë kalim ilegal valute dhe PD e dinte që përpara, tani akuzojnë Ballën. Ta shohim një gjë të tillë. Balla pretendon se do t’i hedhë në gjyq, d.m.th është një gjë që po zhvillohet. Më duket e parakohshme që të rrimë dhe të japim mend. Duhet pritur të shohim se kush ka të drejtë dhe kush gënjen. Por duhet theksuar se nga çfarë kemi parë deri tani, unë nuk i besoj Bashës, absolutisht që nuk i besoj”, deklaroi ish-kreu i SHISH.
Fatos Klosi shtoi se Partia Demokratike ka zgjedhur që të bëjë politikë dhe opozitë përmes baltosjes dhe shpifjeve. Sipas tij, strategjia politike e demokratëve nuk është e mbështetur në alternativa.
“Ata po përpiqen me të gjitha mënyrat që të hedhin baltë, kjo është strategjia e luftës politike të tyre. Nuk po shohim gjë tjetër që nga zgjedhjet e fundit, ata e vetmja gjë që po bëjnë është që po përpiqen të hedhin baltë me drogën, me këtë rast. Nuk shoh që të bëjnë një politikë dhe një luftë që të mbështetet në alternativa apo gjëra që popullit t’i interesojnë. Për këtë arsye them që nuk dua t’i besoj. Tani të shohim, nuk e themi dot me siguri sepse nuk e dimë të vërtetën. Fakti që Balla thotë se unë pranoj që të më bëhet gjykimi tek sheshi “Skënderbej” nëse është e vërtetë, tregon që ka një farë sigurie”, vijoi më tej ish-kryetari i SHISH.
Fatos Klosi komentoi dje për gazetën edhe faktin që kryetari i Partisë Demokratike, Lulzim Basha kishte dijeni për paratë në makinë para se të kryhej operacioni policor. Ai u shpreh se një gjë e tillë tregon që ka patur rrjedhje informacioni nga Shërbimit Informativ Shtetëror.
“Ka pasur një rrjedhje informacioni. Unë dëgjova që PD e ka marrë informacionin përmes Shërbimit Informativ dhe nuk çuditem për këtë gjë. Është një informacion që kalon nëpër shumë duar dhe sigurisht që edhe del”, tha ai.
Nga ana tjetër, Fatos Klosi e konsideroi këtë rrjedhje informacioni si diçka të rrezikshme për operacionet e policisë. Sipas tij, të tilla të dhëna nuk duhet të përdoren për të bërë politikë, aq më tepër para se të kenë vepruar agjencitë shtetërore.
“Por për mua të dalë në shtyp para se të bëjë një aksion policia e quaj të dëmshme. Është shumë e gabuar që të ngutesh dhe ta përdorësh informacionin për kauzë politike ndërkohë që akoma nuk është bërë aksioni. Çdo gjë mund të bëhet nga mbrapa, por jo përpara, përpara është e gabuar. Tani a është gabim apo është bërë edhe për ta sabotuar operacionin, ashtu siç ka zëra, unë nuk di ta them”, u shpreh Fatos Klosi.
ma.me
