Ministrja e Mbrojtjes, Mimi Kodheli zhvilloi sot nëpërmjet një videokonference një bashkëbisedim me trupat paqeruajtëse shqiptare me mision në Afganistan, me rastin e festës kombëtare të Flamurit.
Gjatë komunikimit ministrja përshëndeti oficerët, nënoficerët dhe ushtarët që ndodhen jashtë kufijve të atdheut dhe i cilësoi ata krenaria jonë.
“Ju na bëni të ndjehemi krenarë për ju, u tha Kodheli ndërsa nënvizoi se, kemi bërë zgjedhjen e duhur duke ju çuar ju atje. Shpresoj shumë që me kthimin tuaj të vini me një eksperiencë të re, që është sa profesionale, aq edhe njerëzore. Duke qenë atje ju kuptoni fort mirë se sa i bukur dhe i shtrejntë është atdheu ynë. Jo se është atdheu i shqiponjave, që jeni ju, por sepse është i joni. Është bërë me shumë mund, me shumë djersë, me dëshmorë, me heronj, të heshtur shpeshherë. Dhe vetëm duke qenë atje e kuptoni se sa e dashur është Shqipëria”.
Nga Afganistani e morën fjalën përfaqësuesi ynë ushtarak në misionin Resolute Suport, në Kabul, kolonel Dilaver Hoxha dhe Nënkolonel Bardha Pali, e cila përvec uniformës përfaqëson edhe fëmrën në FA.
Ajo u shpreh se “Ne ushtarakët shqiptarë këtu në vendin e trazuar, ku flitet me gjuhën e armëve e ndjejmë përgjegjësinë që kemi përpara popullit tonë dhe në veçanti para FA ndaj përkushtimi ynë është maksimal dhe do të bëjmë të pamundurën që emri i FA Shqiptare të skalitet në historinë e popullit afgan si një forcë aktive për kontributin e saj në vendosjen e paqes dhe demokracisë”.
Në fund të fjalës së saj ministrja Kodheli i uroi të gjithëve festën e Flamurit dhe festën e Çlirimit.
Në bashkëbisedimin në distancë u bënë pjesë edhe Shefi i Shtabit të Përgjithshëm gjeneral major Jeronim Bazo dhe familjarë të pjesëtarëve të Forcave të Armatosura që ndodhen në misione paqeruajtëse zhvilluan një videokonferencë me rastin e festave të nëntorit./a.g/
