Një tjetër tragjedi e rëndë emigracioni është shënuar në Oqeanin Atlantik, ku autoritetet spanjolle kanë gjetur një varkë me 44 persona dhe pesë trupa të pajetë, rreth 120 kilometra larg ishullit Kanaria.
Varka kishte qëndruar për 27 ditë në mëshirë të dallgëve të Atlantikut, përpara se të lokalizohej dhe të shpëtohej nga njësia spanjolle e shpëtimit detar “Guardamar Urania”. Mjeti lundrues u tërhoq më pas drejt portit të Arguineguín, ku mbërriti rreth orës 03:30 të mëngjesit të së enjtes.
Sipas Guardia Civil, shënimet e gjetura në trupin e varkës përputhen me ato të një mjeti lundrues që ishte nisur më 7 gusht nga Gambia, me 127 persona në bord, mes tyre katër gra dhe një foshnjë.
Të mbijetuarit kanë deklaruar përfaqësuesve të Kryqit të Kuq se ishin nisur drejt Ishujve Kanarie me “më shumë se 100 persona”, por gjatë 27 ditëve në det shumë prej tyre kanë humbur jetën.
Gjendja shëndetësore e disa prej të mbijetuarve ishte tepër e rënduar. Për këtë arsye, Shërbimi spanjoll i Shpëtimit Detar dërgoi një helikopter për të evakuuar tre persona dhe për t’i transportuar me urgjencë në spital.
Kjo nuk është tragjedia e parë e këtij lloji në rrugën migratore drejt Ishujve Kanarie. Më 21 korrik, Agjencia e OKB-së për Refugjatët (UNHCR) bëri të ditur se 38 persona ishin shpëtuar në brigjet e Mauritanisë, pasi kishin kaluar 25 ditë në det. Në të njëjtin udhëtim, 143 persona kishin humbur jetën pasi ishin nisur nga porti i Bufalotos në Gambia, në përpjekje për të arritur në Ishujt Kanarie.
Mes të mbijetuarve të asaj tragjedie ndodheshin edhe dy fëmijë, ndërsa prindërit e tyre kishin humbur jetën gjatë udhëtimit.
