Përfundimi i afatit të regjistrimeve e ka gjetur shumicën e maturantëve që kandiduan për në shkollë të lartë në auditoret e universiteteve. Nga 27.700 aplikantë që u futën në garë që në krye të herës, 22.963 prej tyre figurojnë sot të regjistruar në një nga programet e studimit që ofruan institucionet e arsimit të lartë për këtë vit akademik.
Rritja e numrit të kuotave në dispozicion nga universitetet publike është përkthyer në më shumë studentë. Veç tyre ka dhe një numër të konsiderueshëm që kanë mbetur të parealizuara në shkollat publike. Ministria e Arsimit informon se janë 3200 në total, shumica prej të cilave (2600) nuk janë plotësuar dot për shkak se nuk ka pasur aplikime apo persona në listë-pritje për ato programe.
Më konkretisht, bëhet fjalë për degë në rrethe dhe disa profile pak të preferuara nga maturantët. Realisht, rreth 690 prej tyre mbeten bosh për shkak se maturantët nuk arritën të siguronin portofolin e duhur të pikëve, raporton panorama.
SKEMA E RE
Sipas shifrave të bëra publike nga Ministria e Arsimit, pjesa dërrmuese e maturantëve, 18 mijë e 584 studiojnë në një nga degët që kanë fituar në institucionet e arsimit të lartë publik, ndërsa vetëm 4379 janë regjistruar në ato private.
Ndërsa numri i studentëve në shtet ka njohur rritje me të paktën 1 mijë studentë më shumë nga viti i kaluar, nuk mund të thuhet e njëjta gjë për privatin. Këtë e tregojnë qartë shifrat e krahasueshme me një vit më parë. Këtë vit akademik, institucionet e arsimit të lartë privat në total kanë pranuar 1597 studentë më pak nga 2015-a.
Pas pezullimit apo mbylljes së institucioneve që nuk ofronin kushtet për të arsimuar, reforma e re e pranimeve në universitet, e aplikuar për të parën herë ofroi të njëjtën skemë si për publikun, ashtu edhe për privatin që nga aplikimi deri te pranimet.
Mesatarja mbi 6 dhe listimi i programeve që ofrojnë privatët e shtetërorët në formularin e aplikimit ishin dy kushtet që iu nënshtruan të gjitha institucionet e arsimit të lartë. Ndryshe nga vitet e kaluara, kjo e bën të pamundur që këto të fundit të abuzojnë me regjistrimet përtej datës 1 nëntor, siç parashikohet në udhëzim.
Përafërsisht 5 mijë maturantë mbetën këtë vit jashtë dyerve të auditoreve. Sipas të dhënave nga AKP, në total kanë aplikuar përafërsisht 28 mijë kandidatë (bashkë me mbetësit e vjeshtës), prej të cilëve janë regjistruar rreth 23 mijë.
Viti akademik 2015-2016
• 25.574 studentë
• 19.598 publik
• 5.976 privat
Viti akademik 2016-2017
• 22.963 studentë
• 18.584 publik
• 4379 privat
/a.k
