Policia e Tiranës ka finalizuar fazën e pestë të operacionit të koduar “Relay”, pas një hetimi të kryer me metoda speciale, për goditjen e rasteve të transportimit të emigrantëve ilegalë drejt vendeve të Bashkimit Evropian.
Gjatë operacionit “Relay 5”, në bashkëpunim me Prokurorinë e Tiranës, u arrestua një shtetas maqedonas, J. N., 41 vjeç, i cili u kap në flagrancë në aksin rrugor “Kashar–Thumanë”, duke transportuar dy emigrantë. Ndërkohë, u shpall në kërkim shtetasi M. A., 33 vjeç, banues në Durrës, i dyshuar si organizator i këtij rasti.
Gjatë operacionit, policia sekuestroi automjetin me të cilin transportoheshin emigrantët, dy telefona celularë dhe një shumë parash.
Policia bën me dije se po punohet për kapjen e shtetasit të shpallur në kërkim, si dhe vijon hetimi për identifikimin dhe vënien përpara përgjegjësisë penale të personave të tjerë që mund të jenë të përfshirë në këtë veprimtari të paligjshme.
