Kryeministri Edi Rama në një postim në rrjetet sociale bën të ditur se në përfundim të mbledhjes janë marrë dy vendime të rëndësishme sa i takon zhvillimit.
Rama bën të ditur se u vendos finalizimi i projektligjit mbi Bankën Shqiptare të Zhvillimit falë bashkëpunimit me prestigjiozen Cassa Depositi e Prestiti.
Gjithashtu Kryeministri bën të ditur se është miratuar edhe një linjë e re financimi për ndërmarrjet e vogla e të mesme me fokus kryesor tek bujqësia, për të cilën zbuloi se është diskutuar një mbështetje prej 250 milionë Euro kredi të buta.
Edi Rama: Sapo kemi mbaruar një mbledhje për dy çështje të zhvillimit. E para finalizimi i projektligjit mbi Bankën Shqiptare të Zhvillimit falë bashkëpunimit me prestigjiozen Cassa Depositi e Prestiti, një institucion financiar që bën pjesë në gjerdanin e ekselencave italiane jemi gati t’ja shtojmë Shqipërisë këtë motor zhvillimi në këtë stad të ri të vendit. Projekti është absolutisht bindës dhe do të hidhet shumë shpejt për konsultim publik. Banka do të menaxhohet nga një super skuadër shqiptare dhe italiane dhe do të asistohet nga afër nga partnerët e Cassa Depositi e Prestiti për të garantuar një qeverisje të pavarur, profesionale dhe të suksesshme të saj.
E dyta Banka e Shqipërisë sapo ka miratuar një linjë të re financimi për ndërmarrjet e vogla e të mesme me fokus kryesor tek bujqësia. 250 milionë Euro kemi diskutuar që ta mbështesim nga qeveria këtë linjë financimi edhe me një garanci sovrane. Ky është volumi më i madh i vënë ndonjëherë në mbështetje me kredi të buta të agropërpunimit, serave, agroturizmit, teknologjisë e me rradhë. Së shpejti për detaje.
