“Kam besim që në muajt që vijnë do t’i japim atij faturën që meriton. Ta arkivojmë në koshin e plehrave të historisë”.
Ky ka qenë “urimi” i parë politik që ish Kryemistri Sali Berisha ka bërë, në 25 vjetorin e themelimit të gazetës së PD, Rilindja Demokratike.
Berisha tha se kryeministri Rama po përdor pushtetin e tij për të shtypur median dhe për të penguar fjalën e saj të lirë. Sipas Berishës, kreu i qeverisë ka krijuar tregun e zi të fjalës së lirë.
“Sot pas 25 viteve, me trishtim më duhet të them, përsëri fjala e lirë, mediat janë në një situatë kritike. Ka një përbindësh që përdor të gjithë fuqinë e ekzekutivit për të manipuluar, mposhtur, heshtur mediat dhe fjalën e lirë. Ka një përbindësh që ka krijuar tregun më të zi të fjalës. Ky përbindësh është Edi Rama”, tha Berisha.
