Në kujtim të 25 vjetorit të parlamentit pluralist shqiptar u organizua një pritje në pallatin e Brigadave, teksa Kryeparlamentari Ilir Meta, në fjalimin e tij hapës, uroi që ky vit ta njohë kuvendin dhe këtë legjislacion, si parlamentin e Reformës në Drejtësi.
“Është detyra jonë historike për t’u dëshmuar shqiptarëve dhe partnerëve tanë se jemi në lartësinë që kërkon e ardhmja e Shqipërisë. Ne do ta kalojmë këtë sfidë me sukses dhe do të mbahemi mend si Kuvendi i reformës në drejtësi”, tha Meta.
Meta ka falënderuar partnerët ndërkombëtar për mbështetjen që i kanë dhënë Shqipërisë në 25 vite demokraci.
“Falë mbështetjes së pakursyer të partnerëve tanë strategjik, Shqipëria sot është një anëtare e respektuar e NATO-s dhe kandidate për në BE. Shembulli i qartë i rolit të Shqipërisë në arenën ndërkombëtare është organizimi pas 1 muaji i asamblesë parlamentare të NATO-s për herë të parë. Pavarësisht arritjeve të shumta kemi ende shumë rrugë për të bërë, për të përmirësuar vetveten dhe politikbërjen, ekonominë kombëtare dhe t’i ofrojmë qytetarëve më shumë siguri”, tha Meta.
Meta deklaroi se miratimi i reformës në drejtësi do të kthejë besimin e qytetarëve tek drejtësia dhe besimin e investitorëve.
“Këtë kohë që kemi përpara duhet ta shfrytëzojmë me largpamësi sepse miratimi i reformës në drejtësi do të kthejë besimin e qytetarëve tek drejtësia por edhe besimin e investitorëve në mundësitë që ofron Shqipëria. Është detyra jonë historike për ta çuar këtë proces përpara. Shpreh bindjen se do ta kalojmë këtë sfidë me sukses dhe do të mbahemi mend si kuvendi i reformës në drejtësi”, theksoi Kreu i Parlamentit, Ilir Meta.
