Administrata e presidentit amerikan Donald Trump po përballet me një sfidë të re ligjore, pasi 25 shtete amerikane kanë ngritur një padi kundër tarifave të reja tregtare të vendosura ndaj dhjetëra vendeve të botës.
Padia, e depozituar nga një koalicion shtetesh të drejtuara nga demokratët, kundërshton tarifat që variojnë nga 10% deri në 12.5%, të cilat hynë në fuqi në muajin korrik. Sipas administratës Trump, këto masa u vendosën ndaj partnerëve tregtarë, përfshirë Mbretërinë e Bashkuar, Kinën dhe Bashkimin Evropian, për shkak të dështimit të tyre në luftën kundër përdorimit të punës së detyruar në zinxhirët e furnizimit.
Në dokumentin e padisë, shtetet argumentojnë se vendimi është “arbitrar, kapriçioz dhe në kundërshtim me ligjin”, duke akuzuar administratën se po përdor çështjen e punës së detyruar si justifikim për të mbajtur në fuqi një regjim tarifash të paligjshëm.
Nga ana tjetër, Shtëpia e Bardhë mbrojti vendimin. Zëdhënësi Kush Desai deklaroi se SHBA-të po veprojnë në përputhje me kompetencat ligjore për të mbrojtur bizneset amerikane nga praktikat e padrejta tregtare.
Tarifat janë vendosur në bazë të Nenit 301 të Aktit Amerikan të Tregtisë të vitit 1974, i cili lejon marrjen e masave ndaj vendeve që përdorin punën e detyruar. Sipas Zyrës së Përfaqësuesit të Tregtisë së SHBA-së (USTR), ato prekin rreth 99.4% të importeve amerikane.
Ekspertët vlerësojnë se padia mund të përbëjë një sfidë serioze për administratën Trump. Alex Capri, pedagog i biznesit në Universitetin Kombëtar të Singaporit, tha për BBC se mungojnë prova të besueshme që vendet e prekura kanë dëmtuar kompanitë amerikane përmes shkeljeve që lidhen me punën e detyruar.
Kjo është përballja më e fundit ligjore për politikat tregtare të Trump që nga rikthimi i tij në Shtëpinë e Bardhë në janar 2025. Më herët, Gjykata Supreme rrëzoi një pjesë të tarifave të vendosura në kuadër të paketës së njohur si “Dita e Çlirimit”, duke detyruar qeverinë amerikane të rimbursojë dhjetëra miliarda dollarë kompanive që i kishin paguar ato.
Ndërkohë, administrata amerikane po zhvillon hetime ndaj 16 vendeve të tjera për pretendime mbi mbikapacitetin në prodhim, çka mund të çojë në vendosjen e tarifave të reja në muajt e ardhshëm.
