Pep Guardiola te Manchester City. Konfirmimi vjen nga shtypi gjerman që zbulon detajet e marrëveshjes së trajnerit katalanas me klubin anglez. Sipas revistës “Spiegel” dhe gazetës “Bild”, palët kanë arritur marrëveshjen për zhvendosjen e Guardiolës në Premier League edhe pse nuk ka ende një konfirmim zyrtar. “Kicker” e bëri të ditur lajmin të mërkurën, por pa dhënë detaje, ndërsa “Bild” zbulon pikat e kontratës që do të lidhë trajnerin aktual të Bayernit me skuadrën angleze që do të drejtohet deri në fund të sezonit nga Manuel Pellegrini. Sheiku Al Mansour do t’i paguajë katalanasit 25 milionë euro në sezon për tre vitet e ardhshme, duke nisur nga 1 korriku 2016 .
Në rast se shifrat janë të vërteta, atëherë Guardiola do të bëhej trajneri më i paguar në planet pasi të ardhurat e tij në krahasim me pagën që ai përfiton te Bayerni do të dyfishohen. “Bild” shton gjithashtu se Guardiola e ka firmosur kontratën 3-vjeçare por palët preferojnë të mos bëjnë publik asnjë detaj. Trajneri katalanas e bëri të ditur kargimin nga Bayerni përpara disa ditësh pasi nuk preferoi rinovimin e kontratës me gjigandët Bavarezë. Në vendin e tij do të ulet trajneri italian Carlo Ancelotti.
Supersport
