Një 22-vjeçar shqiptar është arrestuar në Rimini të Italisë pas denoncimit të një vajze 20-vjeçare se ishte abuzuar seksualisht nga i riu me origjinë shqiptare.
Ngjarja ndodhi mbrëmë në një lokal nate. 22-vjeçari ishte aty së bashku me shoqërinë e tij, siç raportojnë mediat italiane, të gjithë shqiptarë. Në lokal u njohën me një grup vajzash. I riu shqiptar i kërkoi njërës prej vajzave që të largoheshin nga lokali i natës dhe ajo pranoi. Por në parkingun e lokalit ai nisi ta ngacmonte duke tentuar ta puthte dhe ta prekte.
Më pas, me forcë abuzoi seksualisht me të. 20-vjeçarja u largua dhe lajmëroi mikeshat e saj, të cilat njoftuan më pas policinë. Karabinierët shkuan në vendngjarje, por shqiptari ishte arratisur. Autoritetet mundën ta identifikonin dhe e arrestuan të dielën në mëngjes.
22-vjeçari jeton në Vallefoglia së bashku me një të afërmin e tij dhe punon në një kompani ndërtimi. I riu u dërgua në paraburgim dhe pritet të dalë para gjykatës për masë sigurie të hënën ose të martën.
Ndërsa vajza 20-vjeçare u transportuar në spital, ku mjekët konstatuan shenja dhune në pjesët intime. Ajo u mbajt për disa orë nën kujdesin e mjekëve dhe më pas u dërgua në shtëpi.
/a.r
