Prokuroria ka pushuar hetimet për një nga dosjet më të bujshme që kishte të bënte me demonstratën e përgjakshme të 21 janarit 2011, kur katër persona të pafajshëm humbën jetën.
Gjatë tetë muajve të fundit janë kryer verifikime për dy ish-krerët e Policisë së Shtetit, Hysni Burgaj dhe Agron Kuliçaj.
Shërbimi i Kontrollit të Brendshëm kërkonte marrjen e tyre si të pandehur, pasi ata nuk kishin zbatuar urdhrat e ndalimit për zinxhirin komandues të Gardës së Republikës, pas demonstratës, të cilët dyshoheshin për vrasje. Hetimet, sipas njësisë Task-Forcë në Prokurorinë e Tiranës, nuk provuan dyshimet e arsyeshme se këta drejtues policie sollën pasoja për çështjen.
Me një arsyetim të gjatë, akuza e kryeqytetit ka sqaruar vendimin për të pushuar hetimet ndaj Hysni Burgajt dhe Agron Kuliçajt, ish-drejtorit dhe nëndrejtorit të Policisë së Shtetit.
“Nga hetimet rezultoi se kallëzimi ndaj Hysni Burgajt dhe Agron Kuliçajt nuk qëndron. Nuk provohet akuza e shpërdorimit të detyrës. Mosarrestimi i ‘grupit të zjarrit’ nuk solli pasoja. Prokuroria, pas ngjarjeve të 21 janarit, ka tërhequr urdhrat e ndalimit, pasi nuk provohej se ata persona të ishin autorët. Ish-drejtuesi i Gardës, Ndrea Prendi, u mor i pandehur vetëm një vit pas ngjarjeve, me akuzën e vrasjes. Gjatë kohës që u lëshuan urdhrat e ndalimit, nuk kishte prova për vrasje. Po ashtu, edhe ndaj disa gardistëve të tjerë, nuk u provuan dyshimet dhe në atë kohë, prokuroria tërhoqi urdhrat e ndalimit”, pohojnë burimet nga akuza qendrore.
Prokuroria e ka argumentuar vendimin për të pushuar hetimet në mungesën e pasojave, apo se vetë “grupi i zjarrit”, pas disa negociatave, janë dorëzuar dhe liruar më pas me urdhër të prokurorisë. Në këto kushte, thotë akuza, është hequr edhe përgjegjësia e ish-drejtuesve të Policisë së Shtetit, që ishin kallëzuar.
