Datat 21 të muajit janar në kalendar, ndër vite kanë parë disa ngjarje të ndryshme.
100 vjet më parë, u mblodh Kongresi i Lushnjës, në 2006-ën u nda nga jeta ish Presidenti Ibrahim Rugova, ndërsa 9 vite më parë, katër protestues të opozitës socialiste në atë kohë u vranë në bulevard gjatë protestës kundër qeverisë së ish kryeministrit Sali Berisha.
Në një postim në rrjetet sociale, ish ministri i Jashtëm Ditmir Bushati, e cilëson si turpërues 21 janarin e vitit 2011, ngjarje për të cilën drejtësia ende nuk e ka thënë fjalën e saj.
“I pari na nderon. 100 vjetori i Kongresit të Lushnjes është dëshmi e maturisë politike të njerëzve të mençur që ditën të bëhen bashkë për fatet e Shqipërisë në momente kritike.
I dyti na dhemb. Pasi lidhet me ndarjen nga jeta të Ibrahim Rugovës, në 2006-ën. Personalitetit që udhëhoqi rezistencën ndaj Serbisë e që ndërkombëtarizoi çështjen e Kosovës.
I treti na turpëron. Sepse më 21 Janar 2011, shteti vrau 4 protestues të pafajshëm dhe drejtësia ende nuk e ka thënë fjalën e saj”, shkruan Bushati.
g.kosovari
