Shifra katastrofale për aksidentet në Kosovë. “Unë vetëm desha të bëja botën më të bukur”. Kështu shkruan në memorialin e çiklistit 25- vjeçar, Lorik Restelica, vendosur në rrugën “Nazim Gafurri” në Prishtinë.
Në atë vend, në mbrëmjen e 2 shtatorit të këtij viti, Loriku humbi jetën derisa po kthehej nga shëtitja e zakonshme e tij me biçikletë në parkun e Gërmisë.
Loriku është vetëm një nga 120 viktimat që e pësuan me jetë këtë vit në aksidente rrugore. Derisa 9 mijë e 708 të tjerë u lënduan në gjithsej 15.959 aksidente. Në nderim të viktimave në trafik, më 15 nëntor para Teatrit Kombëtar u ndezën 120 qirinj. Secila dritë simbolizonte shuarjen e një jete njerëzore.
