Partia Demokratike, nëpërmjet Sekretarit Organizativ, Enno Bozdo, u shpreh se rritja e taksave dhe përkeqësimit të klimës së biznesit, ka bërë që shumë investitorë të mëdhenj të braktisin vendin. Sipas tij, investimet e huaja direkte kanë rënë këtë vit me 40%.
“Dhoma Amerikane dhe ajo Gjermane e Tregtisë shprehen se klima e biznesit është përkeqësuar në pikiatë. FMN-ja deklaron se politika e taksave të larta progresive ka dështuar plotësisht dhe koncesionet korruptive i kanë marrë frymën ekonomisë. Ndërsa Rama mburret me një projekt dhe një investitor që i takon qeverisë të mëparshme“, deklaroi Bozdo.
Sekretari Organizativ u shpreh gjithashtu se edhe në sektorin e hidrokarbureve, “Bankers“ u detyrua nga kjo qeveri të ndërpresë prodhimin dhe në fund të largohet.
“Shumë multinacionale të tjera kanë mbyllur zyrat dhe po largohen me shpejtësi nga Shqipëria. Ndërsa inkurajojmë Shell-in dhe e mbështesim plotësisht për investimin dhe besimin që ka në suksesin e projektit, theksojmë se vetëm largimi i Ramës do të mundësojë ardhjen e investitorëve dhe kthimin e Shqipërisë në një vend tërheqës për investimet e huaja“, deklaroi Bozdo.
Me. Ar
