Plazhi dhe parku i pishave në Zvërnec, një prej plazheve më të mëdhenj në vend, u pastruan nga aktivistë të Korpusit të Vullnetarëve, lëvizje e cila për të tetin vit me radhë, çdo pranverë pastron bregdetin. Mëse 150 vullnetarët që u rikthyen në Zvërnec thonë se gjendja do të duhej të kishte ndryshuar por ky nuk është realitet këtu, në këtë zonë turistike ku bizneset vijojnë që të hedhin mbetjet në parkun e pishave, i cili ndonëse pastrohet çdo vit, ndotja vijon të jetë në gjendje alarmante.
Qartë duket se këtu, ndotësit kryesore janë bizneset që operojnë në këtë zonë turistike të cilat mbetjet i hedhin në parkun vetëm pak metër larg rërës. Për çka drejtuesi i lëvizjes Mentor Kikia thekson nga Zvërneci: Apeli këtë herë shkon për qeverisjen vendore e cila duhet domosdoshmërish të marrë masa, këto biznese duhet të gjobiten sepse këtu situata është e pandryshuar’.
Vullnetarët që morën pjesë në këtë aksion vendosën të hiqnin edhe mbetjet e hedhura nga bizneset kryesisht dhe bënë apelin që kjo situatë të ndryshojë sepse është mjedisi ynë i përbashkët dhe jo vetëm i disave që e shfrytëzojnë në mënyrën me të keqe për të ushtruar aktivitetet e tyre tregtare.
Në përfundim të aksionit, prej plazhit dhe parkut, u hoqën rreth 2 mijë thasë mbetjesh. E çelur në nisje të prillit, fushata e pastrimit të plazheve të Korpusit Shqiptar të Vullnetarëve do të vijojë edhe përgjatë muajit qershor. Vullnetarët shkojnë për të pastruar çdo fundjavë, një plazh.
BW/d.i.
