Në njëzet vitet e fundit në botë janë regjistruar 70.433 akte terrorizmi, mesatarisht mbi 10 në ditë. Mbi 165 mijë njerëz kanë humbur jetën. Rreth 280 mijë të plagosur. Materiali që sjell JavaNews.al tregon se pak më shumë se tre mijë (4% e totalit) aktet e vetëvrasjes, kryesisht në Lindjen e Mesme, Afrikën e Veriut dhe Azinë e Jugut. Këto janë disa nga të dhënat që dalin nga Global Terrorism Database (GTD), burimi më i besueshëm në këtë temë, krijuar nga Universiteti i Marylandit në SHBA.
Vazhdimësia në kohë – Duke parë frekuencën e atentateve terroriste në periudhën nga 1994 deri në 2013, vihet re një fillim i stabilizuar, me reduktim në dekadën 1997-2007 dhe me rritje më pas, me kulmin në vitet 2012-2013. Nëse do të merrnim si moment ndarjeje sulmet në Kullat Binjake në New York më 11 shtator 2001, numri i atentateve në 7-vjeçarin para (1994-2001) dhe në atë prapa (2001-2008) është pothuajse i barabartë.
Rajonet dhe vendet më të goditura – Lindja e Mesme dhe Afrika e Veriut së bashku kanë pësuar dy të tretat (63%) e sulmeve nga 1994 më 2013, të ndjekura nga Azia Juglindore dhe Afrika Sub-sahariane (18% së bashku). Europa është rajoni i pestë në botë për numrin e atentateve të pësuar gjatë gjithë kohës së referimit, mbi katër mijë atentate, (6% e totalit). Më 2013 pati 237 atentate, baras me 2% të totalit botëror.
Duke marrë në shqyrtim vendet më vete, më të goditurit janë Iraku e Afganistani, që së bashku kanë 30% të totalit botëror, duke pasur respektivisht 12 dhe 9 mijë akte terrorizmi.
Për t’u veçuar situata në Libi, e 29-ta në botë, me 360 atentate. Prej tyre, 351 në dyvjeçarin pas përmbysjes së Kadafit, pra vetëm nëntë në 17 vjetët e mëparshëm.
Edhe më keq kuadri i krijuar në Siri, e 27-ta në botë me 505 sulme. Nga këta, 497 në periudhën midis 2011 e 2013, pra që nga nisja e revoltës, vetëm më 2013 janë 272, më tepër se gjysma e totalit. Në kompleks viktimat janë 2.635,me një rritje të pabesueshme në tre vitet e fundit: 45 viktima nga 1994 deri më 2008, 163 më 2011, 875 më 2012 e 1.552 më 2013. 70% e atentateve janë me eksplozivë. Objektivat janë kryesisht civilë, në 135 raste, ndërsa ushtarakë janë në 105 raste. Grupet më aktive janë Al-Nusra, ushtria e lirë siriane dhe ISIS. Qytetet më të goditura janë Damasku (168 atentate), Alepo (56) e Homs (26).
Në Europë – Janë kryer pak më tepër se 4 mijë akte terroriste nga 1994 më 2013, 6 përqind e totalit botëror. Nga këta, sipas GTD, 344 mund të llogariten si aksione rebelimi ose guerrilje, jo terrorizmi. Sulmet vdekjeprurëse kanë qenë 346, me 806 viktima. Të plagosurit janë 5.805 (për 634 sulme), 13 aktet kamikaze.
Franca – Në Francë janë kryer 225 atentate në periudhën 1994 -2013, më tepër se gjysma (151) në vitet ’90. Historikisht, grupi më aktiv është Fronti Nacional Korsikan. Sulmet vdekjeprurëse kanë qenë 18, vdekjet 36. Objektivat ishin kryesisht të natyrës qeveritare dhe ekonomike.
Italia – E papërfillshme në rang global, vetëm 0.2 përqind e totalit, me 138 sulme. Nga këto, 6 kanë qenë vdekjeprurëse, me po kaq viktima. Viktimat përfshijnë edhe të vetmin vetëvrasës, i cili shpërtheu një bombë në një restorant Mac Donald në Breshia, në mars 2004. Të plagosurit në total kanë qenë 103.
Grupet më aktive në Itali janë Federata Anarkiste Informale, Brigadat e Kuqe dhe grupe neonaziste, të cilave u shtohen firmat e huaja të Celulave Luftarake Komuniste dhe Ujqit Gri.
(La Repubblica / JavaNews.al)
