Shkodra ka përkujtuar sot demonstratën antikomuniste të 31 viteve më parë, ku mbetën të vrarë katër dëshmorët e demokracisë, Arben Broci, Bujar Bishanaku, Nazmi Kryeziu dhe Besnik Ceka.
Ky 31-vjetor ka bërë bashkë edhe Partinë Demokratike në Shkodër, ku dyja palët janë parë bashkë teksa i kanë dhënë edhe dorën njëri-tjetrit.
Është parë Helidon Bushati, Emilia Koliqi, Zef Hila, Greta Bardeli dhe Ramadan Lika teksa shtrëngonin duart me kryetarin e Bashkisë së Shkodrës, Bardh Spahia që doli nga koalicioni i “Shtëpisë së Lirisë”, e më pas edhe me ish-kryeministrin Sali Berisha.
Pas një kohe të gjatë kjo është hera e parë që Partia Demokratike është bërë bashkë që pas përçarjes që është krijuar mes tyre.
Ish-kryeministri Sali Berisha foli sot nga Shkodra për procesin e bashkimit të Partisë Demokratike. Ai u shpreh se jo publikisht, edhe më herët është takuar me deputetët e PD me të cilët ka pasur përplasje pas vendimit për përjashtimin e tij nga grupi parlamentar për shkak të shpalljes “non grata” nga SHBA.
Ndërsa i pyetur për skenarin që ka si do e rrëzojë opozita qeverinë “Rama”, Berisha tha se shumë shpejt do të nisë veprimet konkrete, pa zbuluar se për çfarë bëhet fjalë.
Pyetje: Sot dhatë mesazh bashkimi? Pas shumë muajsh perplasje per here te pare u takuat me deputetët e Shkodrës.
Berisha: Nuk jam takuar sot për herë të parë
Pyetje: Publikisht..
Berisha: Dakord kjo qëndron, publikisht është një bashkim i padiskutueshëm me deputetët e Shkodrës që unë i nderoj e respektoj e të gjithë deputetët e PD. Është koha të bashkojmë forcat, energjitë tona përballë një regjimi që përbën një organizatë të vërtetë kriminale në aktet e plaçkitjes së këtij vendi.
Kur janë me kollare e kostume, ky kategorizim pavarësisht se vjedhin në zinxhirë e ndajnë qindra miliona…
Pyetje: E keni skenarin si do e rrëzoni Edi Ramën?
Berisha: Rama e ka ..e keni vënë re që është çekuilibruar se e sheh që ngado që lëviz del ai që është. Kam besim se me qytetarët e Shkodrës e mbarë Shqipërisë ai i ka kohërat e numëruara.
Pyetje: Kur do filloni veprimet konkrete se keni folur prej vitesh?
Berisha: Jam dakord me ju, shpejt do i fillojmë!/m.j
