Sali Berisha, sonte, 11 dhjetor, në një rrëfim për “Opinion” të 35 viteve karrierë në politikë. Sipas kryedemokratit, në vitin 1990, ai e ka ngritur zërin veçanërisht kundër urisë.
Ai theksoi se atë vit, afërsisht 2.5 milion shqiptarë që jetonin në zonat rurale, po vuanin urinë kronike.
“Ishte uri kronike, me të gjitha karakteristikat e urisë kronike. E gjithë fshatarësia, nga Valbona deri në Pogon. Ishte në uri, jo në prag të urisë. Se ka uri akute dhe kronike, kur ti ha diçka, por nuk merr lëndët e nevojshme dhe trupi fillon t’i marrë nga ti, muskujt, për të prodhuar hormone etj. Shfaqen sëmundjet”, tha Berisha.
Madje, rrëfeu periudhën kur kishte punuar si mjek në Peshkopi, dhe u has me një sëmundje që vetëm në libra e kishte lexuar.
“Unë kisha shkuar në Peshkopi në vitin 1986, na çonin për qarkullim, stil kinez. Ndërtova një sallë të vogël reanimacioni, vizitoja të sëmurë, gjeja pelagrën, sëmundje kur njeriu nuk, ha gjë tjetër përveçse bukë misri. Kur kjo nuk shoqërohet me ushqime të tjera, ka një sëmundje sistemike që quhet pelagra. Rastet ishin më të zakonshmet”, rrëfeu ish-kryeministri i vendit.
