1mln USD e PD, heshtja e Prokurorisë/ “Bloomberg” zbuloi megaskandale dhe në Gjermani e SHBA

“Bloomberg”, më tej informoi se të dhënat i përkasin firmës amerikane që fitoi tenderin e skanimit të kontenierëve në prag të zgjedhjeve të 2013-s. Sipas investigimit, pak muaj pasi fitoi këtë tender me vlerë 250 milionë dollarë, kompania i “shiti” për 490 lekë të vjetra 49% të aksioneve tek një kompani e kontrolluar nga njerëzit e Berishës.

Artikulli i publikuar në “Bloomberg” i referohej të dhënave të siguruara nga një kompani investigimi e quajtur “Myddy Waters LCC”. Ndër vite, “Myddy” është shndërruar në një prej denoncuesve kryesore të aferave korruptive në të gjithë botën, përfshi vende me nivel korrupsioni shumë të ulët si SHBA, Gjermania apo Suedi, e gjithashtu vendeve në zhvillim si Brazili apo Kina.

Një prej aferave më të mëdha të denoncuara nga “Myddy” është ajo e kompanisë “Petroleo Brasileiro” (Petrobas), e cila pas denoncimit u provua nga drejtësia braziliane si fajtore për pagim rryshfeti për të siguruar një megakontratë për ndërtimin e një fushe naftënxjerrëse në det. Çështja u gjykua edhe në Holandë, për shkak të kontratave të “Petrobas” në këtë vend. Pas hetimit, drejtësia holandeze vendosi të gjobisë “Petrobas”-in me 240 milionë dollarë.

Në Kinë, hetimi i “Myddy Water”, siç raporton “Financial Times”, solli burgosjen e dy drejtorëve të dy kompanive multimiliardere .

CEO i “Greencool Technology” dhe ai i “Euro Asia” përfunduan të dy në burg, pasi u provua se kishin paguar rryshfet për të falsifikuar parametrat e ndotjes së mjedisit të kompanive të tyre.

Në Suedi, raportimi i “Myddy Waters” goditi një prej rrjeteve më të mëdha telefonike të vendit, “TeliaSonera”, për shkak të pagesave korruptive të bëra nga kjo kompani në vende të treta ku kishte fituar kontrata, përfshi në Nepal dhe në disa vende euroaziatike.

Ky skandal goditi rëndë financiarisht “TeliaSoneran”, e cila humbi brenda ditës 6% të vlerës së aksioneve të saj në bursën e Stokholmit.

Ndërkohë, në Gjermani, “Myddy” shpalli skandalin e firmës “Stroer”, e cila nisi në vitin 2010 si një kompani publicitare pankartash, por brenda pak vitesh njohu një rritje astronomike, duke u shndërruar në një prej klientëve të “Deutsche Bank”.

Pas raportimit të “Myddy”-t, drejtësia gjermane provoi se “Streor” kishte falsifikuar bilancet e saj, me qëllim fitimin e disa kontratave përmes mashtrimit të kompanive partnere.

Në SHBA, “Myddy” ka raportuar disa dhjetëra afera korruptive, të paraqitura edhe në faqen e saj zyrtare, .

Pavarësisht reputacionit të padiskutueshëm të kësaj kompanie, Prokuroria shqiptare ka vazhduar të heshtë, duke mos nisur asnjë hetim zyrtar për zyrtarët e përfshirë në aferën korruptive të tenderit për skanimin e kontenierëve. /lexo.al

ma.me