Apeli i Posaçëm ka dënuar me 190 vite burg në total 35 anëtarë të shtatë bandave kriminale, që trafikonin emigrantë të paligjshëm në këmbim të parave duke falsifikuar dokumentet e udhëtimit ose ato të identitetit.
Në vendimin e formës së prerë gjykata vëren se 35 të pandehurit vepronin si grup i strukturuar kriminal. Ata u hetuan për trafikim të mbi 1000 emigrantëve të paligjshëm drejt vendeve të BE, Anglisë, SHBA-së dhe Kanadasë. Pagesat varionin nga 7 mijë paund për në Britani, dhe 25 mijë deri në 30 mijë dollarë për në SHBA e Kanada.
Ndërkohë grupi hetimor dyshon se një pjesë e emigrantëve janë braktisur nga trafikantët në vendet e Amerikës Latine edhe pas pagesave të kryera për destinacionin e dëshiruar.
Ky grup i strukturuar kriminal u godit ne vitin 2018, nga një aksion i gjerë i policisë shqiptare, në bashkëpunim me policinë franceze, italiane, spanjolle dhe angleze, si dhe dy agjentë specialë të Shërbimit Diplomatik të Sigurisë së Departamentit Amerikan të Shtetit.
/a.r
