Kryetari i opozitës, Lulzim Basha, nuk do të takohet me Kryeministrin Rama pa përfunduar bojkoti 10-ditor i Kuvendit nga Partia Demokratike. Demokratët vendosën në një mbledhje jashtë radhe të Grupit Parlamentar për të bojkotuar punimet e Kuvendit pas përjashtimit të ishkryeministrit Sali Berisha.
Burime pranë selisë blu theksojnë se për aq kohë sa demokratët do të kenë një marrëdhënie të kushtëzuar me Kuvendin, nuk pritet të ketë një takim mes kreut të PD-së, Basha dhe Kryeministrit Rama. Ndonëse në letërkëmbimin që zhvilloi me kreun qeverisë, Basha tregoi gatishmërinë për t’u takuar që nga kjo e mërkurë, përjashtimi i Berishës duket se do të ndryshojë sërish axhendën.
Paralajmërimin për anulimin e takimit, Basha e dha përmes një reagimi në Facebook dy ditë më parë kur theksoi se me përjashtimin e Berishës opozitës i është mbyllur çdo derë bashkëpunimi.
“Kjo është manovër e Edi Ramës dhe Ilir Metës për t’i mbyllur derën opozitës. Për t’i mbyllur derën në parlament, në tryezat ku ajo duhet të jetë e pranishme. Për t’i mbyllur derën në Reformën e Drejtësisë, në reformën zgjedhore”, deklaroi Basha.
TAKIMI
Pas kalimit nen për nen të amendamenteve kushtetuese në Komisionin e Posaçëm për Reformën në Drejtësi kanë ngelur vetëm disa nga nenet që e kanë të domosdoshëm konsensusin politik.
Të premten përmes një letre zyrtare, Kryeministri Rama i’u drejtua kreut të opozitës Basha duke i kërkuar dialog politik për reformën në çdo lloj formati. “Propozime, jo kushte. Dëshirojnë të dialogojnë? Që sot apo që nesër. Çfarëdo formati që kundërshtari im politik të jetë komod, ne nuk kemi asnjë problem ta pranojmë, me kusht të vetëm që dialogu të jetë pa kushte”, do të deklaronte Kryeministri Rama. Në përgjigje të ftesës, Basha pranoi të takohej vetëm se kërkoi që takimi të zhvillohej pas datës 1 qershor për shkak të disa takimeve të tij jashtë vendit.
“Për shkak të një axhende ndërkombëtare të konfirmuar më parë, kryetari Basha është i mundur të realizojë takimin duke nisur prej ditës së mërkurë, datë 1 qershor 2016. Për ditën, vendin dhe formatin e takimit jam e gatshme të vendosim kontakt menjëherë me ju për të nisur rakordimet e nevojshme. Duke ju falënderuar paraprakisht për mirëkuptimin, mbetem në pritje të përgjigjes suaj”, sqaronte në letrën e tij Basha.
Por pasditen e së premtes, pasi kishte ndodhur ky letërkëmbim, Byroja e Kuvendit mori vendimin për përjashtimin e ish-kryeministrit Berisha me 10 ditë nga Kuvendi, për shkak të gjuhës fyese nga kreut të qeverisë Rama.
Panorama/d.i.
