Kandidati i përzgjedhur nga Koço Kokëdhima për të kryesuar PS-në në Bashkinë e Himarës, rezulton ketë bërë burg për trafikimin lëndësh narkotike. Kandidatura e vetme për kryetar partie për Bashkinë e Himarës, arriti t’i shpëtonte filtrave në kryesinë e partisë të hënën, falë këmbënguljes së ish deputetit të Vlorës njëkohësisht koordinator për zonën e jugut.
Ilia ose Ilir Gjicali është dënuar me vendim të formës së prerë në 29 shtator 2007 me 19 muaj e gjysmë burgim për akuzën e “Moskallëzimit të krimit” nga Gjykata e Shkallës së Parë për Krime të Rënda Tiranë ngjarja për të cilën u dënua daton në 24 dhjetor 2005 në Himarë, kur Sektori i Operacioneve Speciale sekuestroi fare pranë detit një fugon të ngarkuar me 335.2 kilogramë kanabis sativa.
Sipas prokurorisë, lënda narkotike ishte bërë gati të trafikohej drejt Greqisë me skaf nëpërmjet detit vendosur në 10 çanta sportive dhe në 10 qese plasmasi. Droga do të dorëzohej kundrejt shumës 23 000 euro. Pavarësisht ankimimit, edhe gjykata e Apelit për Krime të Rënda la në fuqi vendimin. Kandidatura e Gjicalit kaloi formalisht së bashku me të tjerat në kryesinë e PS-së, sipas propozimeve të koordinatorëve.
Por pas daljes në dritë të të palarave në të shkuarën e të përzgjedhurit të Kokëdhimës, ish deputetin e pret një përballje e fortë me anëtarët e tjerë në mbledhjen e radhës së kësaj strukture për këtë vendimmarrje që bie ndesh me parimin e PS-së për kandidatë të “pastër”. 
