Kryetari i Kuvendit, Niko Peleshi, ka përmbyllur turin e diplomacisë parlamentare në vendet balltike me një vizitë zyrtare në Lituani, ku mori mbështetje të mëtejshme për procesin e integrimit europian të Shqipërisë dhe për organizimin e Samitit të NATO-s në Tiranë në vitin 2027.
Gjatë qëndrimit në Vilnius, Peleshi zhvilloi takime me kryetarin e Parlamentit të Lituanisë, Juozas Olekas, dhe kryeministren Inga Ruginienė. Në fokus të bisedimeve ishin avancimi i negociatave të Shqipërisë me Bashkimin Europian, siguria europiane, bashkëpunimi në kuadër të NATO-s dhe forcimi i marrëdhënieve dypalëshe.
Peleshi shprehu mirënjohjen për mbështetjen e vazhdueshme të Lituanisë ndaj Shqipërisë në rrugën drejt anëtarësimit në BE, ndërsa theksoi angazhimin e vendit tonë për paqen dhe sigurinë në rajon, si edhe kontributin në kuadër të Aleancës Atlantike.
Nga ana e tij, Olekas riafirmoi mbështetjen e plotë të Lituanisë për Shqipërinë, duke vlerësuar progresin e shpejtë të vendit në procesin e integrimit europian. Ai theksoi se zgjerimi i Bashkimit Europian do të jetë një nga prioritetet kryesore të Presidencës lituaneze të BE-së gjatë vitit 2027.
Kryetari i Parlamentit lituanez vlerësoi gjithashtu qëndrimin e Shqipërisë në mbështetje të Ukrainës dhe kontributin për sigurinë dhe stabilitetin në Ballkanin Perëndimor, ndërsa konfirmoi mbështetjen për organizimin e Samitit të NATO-s në Tiranë në vitin 2027.
Në takimin me kryeministren Inga Ruginienė, Peleshi u ndal te zhvillimet e fundit në procesin e integrimit europian, duke theksuar se Shqipëria ndodhet në një moment të rëndësishëm pas hapave të fundit në negociatat me Bashkimin Europian.
Edhe kryeministrja lituaneze vlerësoi progresin e Shqipërisë dhe ritheksoi se zgjerimi i BE-së mbetet një prioritet strategjik, duke e lidhur atë me sigurinë, unitetin dhe prosperitetin e Europës.
Gjatë vizitës në Vilnius, Peleshi zhvilloi gjithashtu takime me anëtarë të Grupit Parlamentar të Miqësisë me Ballkanin Perëndimor, ku u diskutua mbi forcimin e bashkëpunimit parlamentar dhe perspektivën europiane të vendeve të rajonit. Palët vlerësuan se integrimi i Ballkanit Perëndimor mbetet një investim strategjik për paqen dhe sigurinë në Europë.
