Diego Maradona është bashkuar me një numër lojtarësh të Juventusit e Realit në një spot interesant për futbollin, pjesë e fushatës publicitare “Somos Futbol” të birrës meksikane Tecate.
El Pibe de Oro është protagonist i reklamës, bashkë me Barzagli, Evra, Padoin e bardhezinj të tjerë, plus disa yje të Real Madrid. Tecate është sponsor si i Juventusit, ashtu dhe i Realit.
Bazuar në historinë biblike të arkës së Noes, mesazhi i dërguar nga Maradona, i cili luan rolin e vetë Zotit, është shumë i bukur: Vetëm dashuria për futbollin mund ta shpëtojë futbollin. Kështu i thotë argjentinasi Noes, kur i kërkon të ndërtojë jo varkën që do të shpëtojë botën, por një stadium.
Noe nis punën i vetëm, por në ndihmë i vijnë lojtarët e Juventusit e Realit, më pas edhe arbitri, lojtarë të tjerë e në fund edhe tifozët, të gjithë të bashkuar për një qëllim të vetëm. Nga qielli fillojnë të bien pikat e para të shiut, që më pas shndërrohet në përmbytje.
Në një skenar sugjestiv në stadiumin e sapondërtuar zhvillohet një sfidë e fortë, por Noe nuk trembet nga asgjë, duhet vetëm që të luhet futboll.
Finalja është e papritur, nuk do të jetë “Dora e Zotit” ajo që shpëton futbollin, por… më mirë shiheni vetë.
D.I.
