Franca është përfshirë nga një vorbull skandalesh seksuale, që kanë si protagonistë zyrtarët e lartë të shtetit dhe politikanët. I fundit ishte rasti i deputetit dhe ish-nënkryetarit të parlamentit francez, Denis Baupin, i cili akuzohet se ka ngacmuar seksualisht dhe u ka dërguar mesazhe erotike disa kolegeve të tij në partinë e ambientalistëve francezë.
Nisur nga ky skandal seksual, 17 ish-ministre në Francë kanë lajmëruan se do të denoncojnë sistematikisht rastet e ngacmimeve seksuale, abuzimeve, apo edhe sjelljeve jo të përshtatshme. Përfaqësueset femra në politikën franceze kanë bërë një thirrje në të përjavshmen vendëse, “Journal du Dimanche” një nismë e cila quhet “nuk do të heshtim më”. Ato kërkojnë që “kodi i heshtjes” në qeverinë franceze të mos respektohet në rastet e skandaleve seksuale. Ndërkohë, Franca po diskuton në internet, tek hashtagu #CulotteGate për abuzimet seksuale në Francë.
Rasti i deputetit Baupin nuk është i vetmi. Edhe ministri francez i Financave, Michel Sapin, e ka ekzagjeruar kur vendosi të prekte një gazetare, e cila ishte përkulur, pasi i kishte rënë një stilolaps në tokë. “Ai nuk mundi ta frenojë dorën dhe mërmëriti: Oh, ç’po më tregoni? – dhe i tërheq llastikun e mbathjeve të gazetares, që i dilte prej pantallonave”. Kështu e përshkruajnë gazetaret “Stéphanie Marteu” dhe Azize Zemouri në librin e tyre një skenë që kishte ndodhur në janar të vitit 2015 në Forumin Ekonomik Botëror në Davos, Zvicër.
Titulli i librit, “L’Elisee Off”, aludon për intrigat pas dyerve të Pallatit të Republikës në Paris. Sapini konsiderohet si i besuar i presidentit francez Francois Hollande. Që kurse incidenti u bë i njohur, komuniteti i internetit po diskuton në hashtagun #CulotteGate për abuzimet seksuale në Francë. “Culotte” u thonë në frëngjisht të mbathurave. Debati vazhdon edhe në mediat tradicionale. 500 gra dhe burra kanë nisur në gazetën “Libération” një peticion kundër ngacmimit seksual nga ana e politikanëve.
“Në përgjithësi për gratë është e vështirë të flasin në lidhje me këtë lloj dhune, por në mikrokozmosin politik, një gjë e tillë pa dyshim është e përforcuar”, thuhet në peticion. Fjalë për ngacmime seksuale dëgjohen shpesh, por ndaj tyre nuk ndërmerret asgjë.
Sipas “Deutsche Welle”, Cornelia Moser, studiuese pranë qendrës studimore kombëtare “Centre Scientifique de la Recherche”, organizata më e madhe franceze kërkimore në Paris, thotë se në sferën politike të Francës mbizotëron një “atmosferë heshtjeje”. “Në politikë është fjala për pushtet. Kudo ku është fjala për pushtet dhe të holla, aleancat mes burrave funksionojnë shumë mirë dhe ata mbrojnë njëri-tjetrin”.
BW/d.i.
