Agjencia Kombëtare e Mjedisit ka bere te njohur hartën e plazheve të bregdetit shqiptar, sipas cilësisë së tyre.
Plazhet më të këqija gjenden në vijën bregdetare që shtrihet nga Durrësi në Kavajë, por nuk mungojnë as në Vlorë e Sarandë.
Nga plazhi i njohur si Tropikali, Kompleksi Xhardino apo Kompleksi Majami në Durrës, te Plazhi i ri në Vlorë, e te Kanali i Cukës në Sarandë.
Të dhënat janë mbledhur nga Stacionet e Monitorimit të kësaj Agjencie, të cilat i referohen parametrave të ndotjes nëpër këto plazhe duke i renditur në katër kategori: Shumë të mirë, të mirë, me cilësi të mjaftueshme dhe me cilësi të keqe. Bie në sy se plazhet më të këqija gjenden në vijën bregdetare që shtrihet nga Durrësi në Kavaje.
Ato janë Majami, Kompleksi Xhardino, Lokali Reshatit dhe Fusha e Sportit. Në zonën e Durrësit janë evidentuar dy plazhe të këqija: Ministria e Rendit dhe Tropikali.
Në Vlorë janë evidentuar dy plazhe problematikë, Shkolla e Marinës dhe Plazhi i Ri. Dy plazhe të këqija janë evidentuar gjithashtu edhe në Sarandë, Plazhi i Ri dhe Kanali i Cukës.
Plazhet më të mira janë nga Velipoja, deri në Gjirin e Lalzit, sipas Agjencisë Kombëtare të Mjedisit, qe i shtohen edhe plazhet e Dhërmiut, Himarës e Borshit. (b.an)