Teoricienë shqiptarë pohojnë se projekti i tyre për Shqipërinë e madhe mund të realizohet pas më pak se shtatë vjetëve të ardhshme, sepse, siç kanë thënë ata në analizat e veta, “Evropa e dobësuar nuk do të ketë as forcë dhe fuqi ushtarake që t’iu dalë ndesh kërkesave shqiptare dhe ne vetëm duhet të jemi të durueshëm”.
Nëse Perëndimi ka shpresuar se ëndrra për Shqipërinë e madhe është vetëm ëndërr, duket se ajo po ballafaqohet me ankth, konstaton gazeta serbe vijesti online. Ambasadori i Britanisë së Madhe, Ruairi O’Connell, siç ka thënë, është i shqetesuar që “bashkimi i Kosovës me Shqipërinë tingëllon si kërcënim”.
Evropa, sipas këtij portali serb, nuk e ka kuptuar se me njohjen e pavarësisë së Kosovës në vitin 2008, në fakt e ka filluar fazën e parë të këtij qëllimi politik të kombit shqiptar. Nëse Kosova, qoftë dhe si vëzhguese, merr karrigen në OKB, ajo do ta shpallë referendumin për bashkimin me Shqipërinë, mendojnë analistët.
Sepse qëllimi i tyre i fundit nuk është që t’i njohë Serbia, por vetëm Kombet e Bashkuara dhe bota, shkruan kjo gazetë, që mund të lexohet edhe si fillim fushate të Serbisë kundër synimeve të Kosovës për pranim në OKB.
Dita/d.i.
