Komisioni Qendror i Zgjedhjeve i ka propozuar Parlamentit që të ndryshojë Kodin Zgjedhor për pjesën e financimit të partive politike, shkruan Panorama.
KQZ ka hartuar një sërë amendamentesh ligjore, të cilat do t’i dorëzohen Komisionit të Posaçëm të Reformës Zgjedhore, ku kërkohen që të deklarohen emrat e donatorëve të fushatave të partive politike, si dhe të mos lejohen donacionet nga subjektet që kanë përfituar koncesione apo para publike.
Në analizën e KQZ-së bëhet me dije se partitë politike shfrytëzojnë hapësirën ligjore, duke deklaruar si donatorë një pjesë të vogël të anëtarësisë, ndërkohë që vlerat e tjera i deklarojnë poshtë 1 milion lekëve, në mënyrë që të ruhet anonimati.
Për këtë arsye, KQZ propozon që pjesë e detyrimit për të deklaruar emrin e donatorët të jenë dhe personat që japin deri në 150 euro, ose sa një pagë minimale. “Në fushatën zgjedhore 2009: 59% e vlerës së ‘donacioneve’ ka si burim donatorët të shumave nën 100 mijë lekë. Në vlerë absolute, kjo është 64 435 904 lekë. Pjesa tjetër, pra 41%, janë donatorë të shumave mbi 100 mijë lekë.
Fushata zgjedhore 2011: 78,8% e vlerës së ‘donacioneve’ janë nga donatorë të shumave nën 100 000 lekë, që nuk janë objekt i nenit 90 të Kodit Zgjedhor. Fushata zgjedhore 2013: 30% e vlerës së ‘Donacioneve’ janë donacione me vlerë nën 100.000 lekë. Ndaj, këto dispozita duhen ndryshuar me qëllim që të ulet ky prag (deri në 150 euro, sa paga minimale), në mënyrë që të bëhen publike të gjitha dhurimet që u bëhen partive politike”, thuhet në rekomandimet e KQZ-së.
Po ashtu institucioni i administrimit të zgjedhjeve kërkon që të hartohet një dispozitë e veçantë, që donatorët e fushatës së një partie politike, pas zgjedhjeve, të emërohen në institucione publike.
“Përveç kësaj, duhen parashikuar kufizime edhe për donatorët individualë, në mënyrë që donatorët e partive të mos caktohen pas zgjedhjeve në funksione publike në administratën shtetërore apo në shoqëritë me kapital shtetëror”, thuhet në analizën e KQZ-së.
Po ashtu në rekomandimet e KQZ-së kërkohet një monitorim i veçantë për subjektet që financojnë partitë politike, por dy vitet e fundit kanë përfituar fonde publike apo kanë marrë koncesione. Për këto subjekte KQZ-ja kërkon që të monitorohen dhe para, por edhe pas zgjedhjeve.
Panorama/d.i.
