Veliaj, “kunja” Presidentit: Kur doli për një kënd lojërash, po për projektet e mëdha…

Erjon Veliaj i ka hedhur një “kunjë” sot Presidentit të Republikës dhe opozitës, direkt nga konsultimi me qytetarët për sheshin Skënderbej. “Kur një projekt lodrash të parku i liqenit që mbaron brenda 4 javësh nxori në “luftë” edhe Presidentin, imagjinoni çdo bëjnë për projektet e tjera”, tha kryebashkiaku i Tiranës.

Bashkia zhvilloi sot konsultimin me banorët e Njësisë 9, lidhur me projektin për Sheshin Skënderbej. Erion Veliaj bëri të ditur se brenda kësaj fundjave do të hapet pjesa e Unazës së Vogël, prapa Muzeut, për të vijuar punimet me pjesën tjetër, pas Hotel Tiranës.

“Prona e atyre që kanë shtëpinë në Njësinë 9 do të rritet duke patur parasysh Unazën e Vogël dhe investimet që po bëhen në shesh. Brenda kësaj fundjave do të hapim një pjesë të unazës, për të vijuar punën pas Hotel Tiranës, tek pjesa e INSIG-ut. Kjo do të thotë se për çdo njeri që tregohet cinik dhe dashakeq për punët e Bashkisë, ne i përgjigjemi me punë. Nëse njeriu ka vendosur të jetë negativ për çdo lloj pune këtë nuk e kurojmë dot”, deklaroi Veliaj.

Kryebahkiaku Veliaj tha se do të vijojnë projektet në gjithë qytetin për rehabilitimin e rrugëve, dhe përmirësimin e kushteve në Tiranë.

“Nuk ka popull të civilizuar që i hedh mbeturinat në lumë. Ne sapo kemi filluar punën me parkun e Kasharit. Do të fillojmë edhe në rrugët e tjera. Po punohet edhe brenda lagjeve të Tiranës. Ne kemi një ritëm të jashtëzakonshëm, ecim shumë shpejt. Që do ketë kundërshtarë në këtë projekt dihet. Kur një projekt lodrash të parku i liqenit që mbaron brenda 4 javësh nxori në ‘luftë’ edhe presidentin, imagjinoni çdo bëjnë për projektet e tjera. Sheshi “Skëndërbej” është një pikë ku mblidhen të gjithë shqiptarët. Unë e di që në Shqipëri ka anomali, por me punën e vazhduar do rregullohet. Qyteti që ëndërroj nuk është që edhe të varfrit të bëhen me makinë, por që edhe të pasurit të lëvizin me autobus. Gjithë ky trafik, kjo ndotje, është pasojë e veprimeve tona. Ndotja e madhe e ajrit shkakton edhe dëme në shëndet. Për këtë duhet të kujdesemi të gjithë. Të përdorim biçikletat, dhe të ecim pak më shumë”, tha Veliaj.