Shtetas të huaj, profesionistë në fusha të ndryshme, zgjedhin Tiranën për të ndërtuar jo vetëm karrierën e tyre, por edhe për të jetuar. Të tillë janë edhe 16 shtetasit më të rinj që morën nënshtetësinë shqiptare dhe u betuan përpara kryebashkiakut të Tiranës, Erion Veliaj, për besnikëri ndaj shtetit shqiptar dhe për respektimin e Kushtetutës e të legjislacionit të Republikës së Shqipërisë. Gjatë ceremonisë së betimit, Veliaj u shpreh se sot është shumë e rëndësishme të reflektojmë për bashkëjetesën në komunitet.
“Teksa për të tjerët do flas për fqinjësinë, për ju do të flas si bashkëqytetarë, sepse tani ndajmë të njëjtën kombësi, të njëjtin qytet, të njëjtat aspirata, dhe jemi pjesë e një misioni që quhet “Misioni Shqipëria”, për ta bërë këtë vend, jo vetëm kozmopolitan, por edhe një vend evropian e të modernizuar”, tha ai.
Veliaj u shpreh se kohët që po jetojnë na kujtojnë se sa e rëndësishme është fqinjësia e mirë dhe ruajtja e saj. “Mjafton të shikoni atë që po ndodh sot me agresionin e Rusisë ndaj Ukrainës, për të kuptuar se miqtë dhe fqinjët nuk duhen marrë si të mirëqenë. Ne mendojmë gjithmonë se fqinjët janë gjithmonë aty, dhe nuk ka nevojë t’i kushtojmë shumë rëndësi. Por, nëse edhe në pallatin ku jetojmë nëse një fqinj bën zhurmë, nëse bëhet i dhunshëm, nëse ndot, ndikon në të gjithë lagjen, në pallat, madje edhe në vlerën e shtëpisë tënde. Imagjino të kesh një fqinj që të pushton ose që të pengon, që të kthehet në një hendek mes teje dhe progresit, mes teje dhe të ardhmes, mes teje dhe ëndrrave”, tha ai.
Kryebashkiaku u shpreh se shqiptarët, ashtu si në rastin e hebrenjve gjatë Luftës së Dytë Botërore, gjithmonë kanë ditur të mbështesin njerëzit në nevojë. “Vjet pritëm një komunitet prej mijëra qytetarësh afganë, që erdhën fillimisht në Tiranë, pastaj edhe në disa vende të tjera të Shqipërisë, të cilët gjetën shpëtim nga ajo që po ndodhte në Afganistan, derisa më pas morën dokumentat për në SHBA. Më vjen mirë që Tirana dhe Shqipëria është kthyer në një vend strehimi, sidomos për gratë dhe fëmijët që vijnë nga Ukraina – ata janë më të dobëtit, më të pafuqishmit, më të pafajshmit në këtë konflikt. Më vjen mirë se si shqiptarë, kemi një fije të padukshme të vëllazërisë, të një dere të hapur, të një zemre të hapur, të mikpritjes ndaj atyre në nevojë, e solidaritetit me atë që po kalon një fatkeqësi, që është më i dobët se ne në këtë moment”, deklaroi Veliaj.
g.kosovari
