Tre fëmijët e tij, Xhesika, Xhoela dhe Rigelsi, e surprizuan Gentjanin duke e ftuar në rubrikën “Ka Një Mesazh Për Ty” në “E Diela Shqiptare”, duke i realizuar kështu një ëndërr që ai e kishte prej kohësh.
Mungesa ndër vite në familje për shkak të punës mbetet një nga pengjet e tij më të mëdha, ndërsa sot Gentjani po përpiqet të rikuperojë kohën e humbur me fëmijët e tij.
Pasi fëmijët i dhanë “notën 10” si babai më i mirë, ai shpërtheu në lot, duke kujtuar sakrificat e mëdha që ka bërë ndër vite për të siguruar jetesën e tyre.
Gentjani u shpreh se është shumë krenar për fëmijët e tij, të cilët sipas tij nuk i kanë sjellë asnjë problem në jetë. Ai tregoi se ka punuar për vite të tëra me orë të zgjatura, shpesh deri në 16 orë në ditë, aq sa nuk kishte më fuqi të kthehej në shtëpi.
Gentjani: Unë jam shumë krenar për vajzat dhe për djalin gjithashtu. Shumë krenar. Nuk më kanë sjellë asnjë problem në jetë. Kanë qenë të urta dhe të edukuara. Kam punuar shumë Ardit. Kam ndenjur edhe shumë larg familjes, s’më ka lënë puna.
Por gjithsesi jam përpjekur shumë, shumë, shumë që këtyre asnjë gjë mos t’u mungojë.
Arditi: Kjo është sakrifica që bën çdo prind. Dhe në fund të ditës të gjithë ne kuptojmë.
Gentjani: Ma kanë shpërblyer Ardit! Ma kanë shpërblyer…
Arditi: Kjo është gjëja më e rëndësishme. Kur fëmija ta shpërblen…
Gentjani: Ma kanë shpërblyer. Janë perfekte!
Arditi: Ky është satisfaksioni më i madh për një prind.
Gentjani: Janë më shumë perfekte seç duhet mendoj.
Arditi: Ndërkohë vajzat kanë parë një ndryshim në jetën tënde. Çfarë ndodhi që ti ndryshove?
Gentjani: Ndodhi që puna e shumë viteve dha frytet e veta Ardit. Unë imagjino, kam qenë në Vlorë. Imagjino, rrija 16 orë në punë Ardit. S’kisha fuqi të vija në shtëpi. Flija aty. Ato janë rritur, kuptojnë më shumë. Mbase më kanë mirëkuptuar, por edhe unë nuk e di Ardit çfarë ka ndodhur. Nuk e di, as vetë s’e di. As vetë nuk e di, edhe atëherë aty kam qenë, por ndoshta jo kaq shumë sa tani. Tani jam më i qetë, i kam punët më në terezi. Rri më pranë familjes, kuptohet.
