Grupi i parë prej 16 mijë vullnetarësh të huaj janë tashmë rrugës për të mbrojtur Ukrainën.
Kështu deklaroi presidenti ukrainas Volodymyr Zelensky gjatë një video-mesazhi drejtuar qytetarëve të tij.
“Ukraina merr armë çdo ditë nga partnerët tanë. Nga miqtë e vërtetë. Çdo ditë e më shumë armë të fuqishme. Ukraina tashmë takohet me vullnetarë të huaj që shkojnë në vendin tonë. Të parët nga 16 mijë.
Ata shkojnë për të mbrojtur lirinë. Për të mbrojtur jetën. Për ne. Për të gjithë. Dhe do të jetë i suksesshëm. Jam i sigurt”, theksoi kreu i shtetit.
Më 27 shkurt, Zelensky u bëri thirrje të huajve që të vijnë në Ukrainë dhe të bashkohen në luftën kundër trupave ruse.
Një njësi e veçantë është formuar për të huajt – Legjioni Ndërkombëtar i Mbrojtjes Territoriale të Ukrainës.
Presidenti prezantoi nga 1 marsi një regjim pa viza për të huajt që dëshirojnë të bashkohen me Legjionin Ndërkombëtar të Mbrojtjes të Ukrainës.
Regjimi pa viza është futur përkohësisht për periudhën e gjendjes ushtarake.
g.kosovari
