Prej gati një jave spekulimet për rënien e helikopterit të Forcave të Armatosura nuk rreshtin. Çfarë nuk është thënë dhe hamendësuar për shkaqet e rrëzimit të një prej helikopterëve më të rinj të Forcës Ajrore. Për hir të së vërtetës ata që kanë folur deri dje kanë qene ose amatorë ose anonimë. Vetëm dy ditët e fundit kemi pasur mundësinë të dëgjojmë ekspertët e vërtetë, ata që kanë kaluar një jetë në fluturim.
Në një status në Facebook, ish-atasheu ushtarak në Francë, Zaim Kuçi, me 44 vite eksperiencë në FA, flet për natyrën e profesionit të pilotit dhe shpreh keqardhje që ngjarje të tilla përdoren politikisht. “Fluturimi mbetet një enigmë dhe është kapriçioz. Ai nuk mund të jetë objekt njohje i të gjithëve, aq më keq të trajtohet dhe të sillet i zgjidhur nga të gjithë. Ai i përket specialistëve dhe vetëm atyre. Është e papranueshme kur kërkohen situata për përftime politike.” – shkruan Kuçi, i cili nuk harron t’i cilësojë kolegët e tij si pjesën më të mirë të shoqërisë “Në 44 vite në uniformë kam arritur në konkluzionin se nëse do të punohej në të gjitha fushat e ndërtimit të shtetit shqiptar me ritmin, përkushtimin, ndërgjegjen dhe guximin e pilotit, Shqipëria do të ishte në listën elitare të vendeve në zhvillim”, e mbyll ai statusin e tij.
Një natë më parë në emisionin “Opinion” në TV Klan morëm përgjigje edhe për spekulimet që na kanë shoqëruar gjatë gjithë javës. Ndërkohë që është kërkuar llogari se pse nuk janë hapur jastëkët e ajrit, ekspertët na konfirmuar se helikopteri nuk ka të tillë. Gjithashtu mësuam se helikopteri nuk ka kuti të zezë, të cilën është thënë e stërthënë se është dëmtuar qëllimisht për të zhdukur provat. Mësuam se për shkak të përplasjes, pjesët e helikopterit mund të shpërndahen edhe në një hapësirë edhe më të madhe se 300 m. Madje, për shkak të vendndodhjes së serbatorëve të karburantit, iu dha përgjigje edhe dëshmisë së banorëve se dëgjuan një shpërthim në momentin e rrëzimit të EC 145. Por më e rëndësishme ishte përgjigjja që iu dha dyshimeve të cilësisë së karburantit. “Djegia e tij nuk do ishte e rregullt dhe do ndizte një llambë në panelin e instrumenteve”, tha shefi i operacioneve të fluturimit në Rinas, Dritan Goxhaj.
“Është marrë mostra e naftës për të verifikuar cilësinë”, tha gazetari Flamur Vezaj.
“Janë 2 motorë, nuk mund të fiken njëkohësisht për shkak të cilësisë së karburantit”, tha komandanti i Forcës Ajrore, gjeneral brigade Astrit Jaupi, i cili pyetjes direkte të gazetarit Blendi Fevziu se “çfarë mund të ketë ndodhur”, iu përgjigj se “është e parakohshme për të folur. Le t’ia lëmë komisioneve”. Dhe pyetjes së dytë se nga hamendja juaj çfarë mund të ketë ndodhur, iu përgjigj “s’mund të flas.”
Në të njëjtën linjë ishte edhe shefi i operacioneve të fluturimit në Rinas, Dritan Goxhaj, i cili pyetjes se çfarë mund të ketë ndodhur iu përgjigj: “Askush nuk mund ta thotë, përveç ekspertëve” duke iu referuar grupit që po heton shkaqet.
Ajo çka mësuam nga e gjithë kjo histori, që për hir të së vërtetës duhet të na shërbejë edhe në raste të tjera, është se duhet të bëjmë dallimin mes spekulimeve anonime dhe argumenteve të ekspertëve dhe profesionistëve të vërtetë. Por mbi të gjitha, të presim e të shohim përfundimin e hetimeve, se shyqyr Zotit janë të përfshirë edhe francezët edhe amerikanët.
