Komisioni parlamentar i Medias rrëzoi sot dekretin e Nishanit, i cili ktheu për rishqyrtim në Kuvend ndryshimet në ligjin për mediat audiovizive, që parashikon edhe zgjedhjen e drejtorit të RTSH-së.
Deputeti socialist Ulsi Manja tha se dekreti i Nishanit nuk ka asnjë bazë Kushtetuese dhe se presidenti ka tejkaluar caqet ligjore me kthimin e ligjit në Kuvend.
“Presidenti keqinterpretoi orientimet e Venecias”, u shpreh Manja, relator i ligjiit.
Rreth një javë më parë, presidenti Bujar Nishani ka kthyer për rishqyrtim në Kuvend ligjin për mediat audiovizive.
Sipas tij, me këtë ligj rrezikohet të vendoset në krye të RTSH-së një person i parapëlqyer nga maxhoranca.
Kreu i shtetit sheh “non sens ligjor” në faktin që për shkarkimin e drejtorit nevojitet shumicë e cilësuar votash. E gjithë kjo, sipas tij, bëhet për të konsoliduar pozitat e të përzgjedhurit të maxhorancës.
Argumenti i tretë i kreut të shtetit për kthimit e ligjit në Kuvend është fuqia prapavepruese e ligjit të ri i cili ndryshon rregullat e lojës në një kohë kur për kreun e RTSH-s po zhvillohet një garë.
shqiptarja.com
