Dhjetra punonjës të Autoritetit Portual punuan vullnetarisht të shtunën paradite në mbështetje të institucioneve publike dhe bizneseve private që përgatiten për sezonin e ri turistik në Plazhin e Durrësit. Aksioni vullnetar, që u iniciua nga drejtoria e Mjedisit në APD, u përqëndrua në zonën e njohur me emrin “Teuta” të plazhit, për afro 800 metra vijë bregdetare, pranë rrethimit juglindor të portit.
Në bashkëpunim me specialistët e Ndërmarrjes Komunale të Plazhit, rreth 150 punonjës portualë punuan për pastrimin e një sipërfaqe prej disa hektarë. Nismës së APD iu bashkuan edhe punonjës dhe mjete të firmave “Fiona”, “Pastrimi detar” dhe “Varaku”. Më pas mbeturinat e grumbulluara u larguan me mjetet e rënda dhe kamjonët e firmave dhe të ndërmarrjes Komunale Plazh.
Plazhi i Durrësit, nga Ura e Dajlanit deri në Iliria ka një vijë bregdetare prej 3.4 km dhe gjatë stinës së verës vazhdon të jetë hapësira më e populluar turistike në shkallë vendi.
APD do të mbështesë edhe në të ardhmen veprimtarinë vullnetare dhe institucionale për përmirsimin e kushteve shlodhëse në qytetin e Durrësit./a.m.
