Policia e Shtetit po zhvillon mesditën e sotme një operacion në Portin e Durrësit, ku po kryhet kontroll në një automjet të tonazhit të rëndë në terminalin e trageteve.
Paraprakisht dyshohet se brenda kamionit është gjetur një sasi kokaine. Nga peshimi i kokainës raportohet se deri tani është konstatuar mbi 15 kg kokainë nga gjurmët e skanerit në konteiner.
Në pikën e posaçme të kontrollit, ka funksionarë të lartë të policisë.
Nga ana tjetër Policia njofton se nga kontrolli i mjetit deri tani janë gjetur të fshehura 14 pako të mbushra me lëndë narkotike të dyshuar kokainë.
Blutë e Durrësit kanë shoqëruar dy persona për t’u pyetur në lidhje me këtë ngjarje, ndërsa theksojnë se lënda narkotike është zbuluar gjatë kontrollit të detajuar të ushtruar në një kontenier të ngarkuar me banane për llogari të një firme në Shqipëri.
Port, Durrës /Informacion paraprak
Goditet një tjetër rast i tentativës për trafikim të lëndëve narkotike.
Task Forca permanente e përbashkët e përbërë nga Policia Kufitare e Portit të Durrësit, Policia Kriminale e DVP Durrës dhe autoritetet doganore të Portit, evidenton dhe sekuestron deri në këto momente 14 pako me lëndë narkotike të dyshuar kokainë.
Shoqërohen në Drejtorinë Vendore të Policisë Durrës dy persona.
Në vijim të goditjeve të njëpasnjëshme ndaj veprimtarisë kriminale të tentativës për trafikim të drogave të forta, si rezultat i kontrolleve të shtuara, bazuar edhe në analizën e riskut të bërë nga Task Forca permanente e përbërë nga Policia Kufitare e Portit të Durrësit, Policia Kriminale e Drejtorisë Vendore të Policisë Durrës dhe nga autoritetet doganore të Portit, e cila vepron në Portin e Durrësit, në bazë të dyshimeve të krijuara nga kjo Task Forcë dhe informacioneve që dispononte Policia Kriminale, kanë ushtruar kontroll të detajuar në një kontenier të ngarkuar me banane për llogari të një firme në Shqipëri.
Si rezultat i kontrollit të imtësishëm të ushtruar në kontenier, deri tani janë gjetur të fshehura 14 pako të mbushra me lëndë narkotike të dyshuar kokainë . Kontrolli vijon.
Në vijim të veprimeve, specialistët për Hetimin e Narkotikëve në Drejtorinë Vendore të Policisë Durrës kanë shoqëruar dy persona për tu pyetur në lidhje me këtë ngjarje.
Grupi hetimor, nën drejtimin e Prokurorisë së Rrethit Gjyqësor Durrës vijon veprimet hetimore për dokumentimin e plotë kësaj veprimtarie kriminale, identifikimin dhe kapjen e personave të tjerë të përfshirë në të.
g.kosovari
