Gjykata e Catanias në Itali ka dënuar me 15 vite e 5 muaj burgim Moisi Habilajn, i akuzuar për trafik droge nga Shqipëria në Itali. Ai është cilësuar si kreu i grupit të Habilajve që trafikonte marijuanë nga brigjet e Vlorës drejt shtetit italian.
Moisi Habilaj qëndroi i heshtur kur dëgjoi vendimin e Gjykatës, raporton “Meridionews”, e cila përshkruan në detaje edhe veshjen e kreut të grupit; me pantallona xhins, këmishë dhe këpucë me ngjyra të ndezura.
Avokatët e tij mbrojtës, Giuseppe Ragazzo dhe Maria Caltabiano, thanë në seancë gjyqësore se Moisi Habilaj ka pasur rol të thjeshtë në këtë organizatë kriminale, atë të transportuesit. Dhe për këtë arsye, ata kërkonin që mbi Habilajn mos të rëndonte edhe akuza e kreut të grupit, kërkesë që nuk u pranua.
Ndërkohë, gjykata italiane dënoi me 7 vite e 4 muaj burgim Nazer Seitin, i cilësuar si financieri i bandës së Habilajve. Procesi ndaj tij u zhvillua me gjykim të shkurtuar. Seiti u arrestua fillimisht në Shqipëri dhe më pas u ekstradua në Itali.
Në kërkim ka mbetur Florian Habilaj, vëllai i Moisi Habilaj. Ky i fundit është arrestuar në shtetin italian në Tetor të vitit 2017.
