Policia e Shtetit në një deklaratë për mediat ka njoftuar sot se nga data 15 Korrik deri në 10 Gusht janë vënë në pranga 15 persona.
Po ashtu bëhet me dije se janë proceduar dhe 16 persona të tjerë, ndërsa 2 janë shpallur në kërkim.
Policia sqaron se po vijon puna dhe për evidentimin e rasteve të tjera për zjarrvënie të qëllimshme dhe u bën thirrje të gjithëve që të mos kryejnë këtë veprimtari kriminale.
Sipas uniformave blu të gjithë ata që me dashje apo nga pakujdesia ndezin zjarre dhe shkaktojnë pasoja të mëdha do të përballen me forcën e ligjit.
Ndërkohë, kreu i Emergjencave, Haki Çako, ka bërë një deklaratë të fortë në lidhje me zjarrëvëniet në vend. Duke i konsideruara të qëllimshme, Çako tha se këto kriminelë paguhen nga qarqe të caktuara për të djegur vendin. Se cili është qëllimi i tyre, Çako shprehet se duhet ta nxjerrin hetimet.
“Helikopteri është në operacion në zonën e banuan në njësinë Malzi, është një zonë që ka një kohë të konsiderueshëm që po digjet dhe ka zona të banuara dhe aty janë përqendruar edhe forcat e ardhura nga Kosova. Nëse do të përkeqësohet situata, do të ketë edhe evakuim të banorëve. Ne kemi aktivizuar të gjitha strukturat, gjatë gjithë natës janë angazhuar strukturat vendore të Kukësit, Lezhës, mbrojtjes civile ku vijon operacioni.
Nuk ka një rrezik të madh për momentin, por janë duke punuar për të parandaluar përhapjen e zjarreve duhet të jenë diku tek 3 apo 4 vatrave aktive që na bëjnë që të angazhohen shumë forca. Në Karaburun vijon operacioni me helikopterin holandez, është bërë një punë e madhe gjatë ditës së djeshme.
Në fakt duket sikur përsëritet historia e Rozafës, sapo fikim një vatër, ndodh aktivizimi i një zjarri tjetër që të lë të kuptosh se këto janë të qëllimshme. Ëstë një terren aq i madh sa është e vështirtë të mbikëqyrësh të gjithë pyjet dhe hapësirën. Terreni njhet më mirë nga banorët dhe ata që kanë qëllime kriminale për t’i vënë zjarrin, të cilët paguhen nga qarqe të caktuara” tha Çako.
/a.r
