Linda është oficere në profesion, por në “Ka Një Mesazh Për Ty” ajo vjen si motra më e vogël e 9 fëmijëve. Arsyeja e ardhjes së saj në “E diela shqiptare” në Tv Klan, është motra e madhe, Ikbalja, me të cilën ka 20 vite diferencë moshe, për të cilën shprehet se “e ka njohur vonë”. Edhe Ikbalja është gjithnjë në ndihmë të njerëzve pasi profesioni i saj është infermiere, ndaj ishte pikërisht kjo, përveç dashurisë si motër, që e afroi me Lindën në një moment mjaft kritik.
Ardit Gjebrea: Mua më ngeli në mendje që the e kam njohur vonë. Si ka mundësi?
Linda: Ishim shumë dhe natyra ime ishte dhe është sportive, sot jam veshur me fustan, rrallë vishem. Motrat janë martuar herët dhe kisha pak kohë të rrija.
Ardit Gjebrea: Kur thua janë martuar herët, sa vjeç ishe ti kur u martua Ikbalja?
Linda: Kam qenë 5 vjeçe ndoshta. Nipi im, djali i Ikbales, Artani, është 5 vjet më i vogël se mua. Babai i Artanit vdiq shpejt, u desh që babai ynë ta merrte në familje për ta lënë motrën të lirë. Ikbalja pati dhe ka një martesë tjetër me bashkëshortin, Feritin.
Ardit Gjebrea: Artani mbeti në shtëpinë tuaj?
Linda: Artani u rrit tek ne dhe unë e njihja si vëllai im i vogël. Ai i thoshte nënës time njësoj si ne të gjithë.
Ardit Gjebrea: Si u rilidhe me motrën?
Linda: Ndodhi që unë u aksidentova në gjendje të rëndë, isha në koma për 4 ditë dhe kisha nevojë për një shërbim të veçantë. Një makinë më ka goditur me shumë shpejtësi. Kam ndenjur mbi kofano për 20 metra dhe aty kam rrëshkitur. E kam jetë të dytë. Kisha 14 thyerje, 17 qepje në skalp dhe thonin “a do bëhet më Linda?”, por tani unë eci, punoj.
