Në ditën e 14 të ‘luftës’ me flakët, fatmirësisht, mëngjesin e sotëm situata në Vlorë duket më e qetë. Zjarret janë vënë nën kontroll në fshatrat Gjorm dhe Gumenicë, ku po punohet për shuarjen e vatrave të fundit që kanë ngelur.
Po ashtu edhe në Karaburun situata është nën kontroll, ku po punohet për shuarjen e disa vatrave të vogla të zjarrit, ndërsa shpresat e zjarrfikësve dhe ushtrisë të angazhuar në terren janë edhe te kushtet e motit, pasi një erë e fortë do të ndryshonte të gjithë situatën, duke i dhënë vrull flakëve.
Me një situatë të tillë Vlora u përball një ditë më parë, ku flakët morën përmasa të frikshme në fshatrat Gjorm dhe Gumenicë. Zjarret dogjën 3 banesa në Gjorm, disa stane e bagëti, por fatmirësisht nuk pati persona të lënduar. Flakët u përhapën nga era në brenda pak minutave, ndërsa menjëherë Ministria e Mbrojtjes dha urdhër për evakuimin e fshatrave. Për neutralizimin e situatës ndërhynë 2 helikopterë, 2 zjarrfikëse dhe 40 ushtarë të Forcave të Armatosura.
Dramatike ishte situata një ditë më parë edhe në Karaburun, për shkak se era e fortë përhapi flakët dhe pezulloi punën e forcave zjarrfikëse dhe ndërhyrjen nga ajri. Flakët vajtën deri në kufi me Parkun e Llogarasë, por fatmirësisht nuk u prek nga flakët.
Ditën e sotme pritet të vijnë në vend dy helikopterë nga Holanda dhe një nga Çekia, që iu përgjigjën kërkesës së BE për të ndihmuar vendin tonë në ‘betejën’ me flakët.
g.kosovari
