Partizani arriti rezultatin e tetë pozitiv radhazi në derbi, duke mundur 2-0 Tiranën në stadiumin kombëtar “Qemal Stafa”. Vetëm pesë minuta iu deshën Xhevahir Sukajt për t’i dhënë epërsinë skuadrës së tij, ndërsa dhjetë minuta më pas ishte Fejzullau që shënoi edhe golin e dytë.
Koha e mbetur e krijonte mundësinë që Tirana të bënte diçka, por bardheblutë ishin tepër nervozë në ndërtimin e aksioneve, si edhe në ndërhyrje e në komunikimin me gjyqtarin Lorenc Jemini.
Një rast i tillë ishte ai i Elis Bakajt, i cili u largua me karton të kuq sapo nisi pjesa e dytë, duke e lënë skuadrën me dhjetë lojtarë.
Me tri pikët e marra, Partizani shkon në minus një nga Skënderbeu, i cili luan sot. Në varësi të rezultateve, Tirana mund të humbasë vendin e tretë.
