Ministri i Brendshëm, Saimir Tahiri inspektoi të mërkurën punimet për rikonstruksionin e godinës së Policisë Rrugore.
Duke folur për mediat, ministri Tahiri e cilësoi atë si një projekt që do ti shërbejë përmirësimit të shërbimit ndaj qytetarëve.
Sipas tij, punimet pritet të përfundojnë pas rreth tre muajsh.
Ministri informoi po ashtu se brenda pak javësh përfundon edhe sistemi për gjobën këshilluese, që do të jetë gjobë me vlerë zero, për t’i dhënë mundësi njerëzve, veçanërisht drejtuesve të automjeteve, që të kuptojnë se jo çdo takim me policin rrugor është një takim ku do marrësh një gjobë.
“Por ndërkohë çdo takim me punonjësin e Policisë Rrugore do të jetë një takim ku të mësosh se duhet të respektohen rregullat e qarkullimit rrugor, kjo nga njëra anë”, sqaroi Tahiri .
I pyetur mbi sistemin unifikues të gjobave të Policisë Rrugore dhe të Policisë Bashkiake, Tahiri tha se “në kuadër edhe të reformës administrative, njësive të reja administrative dhe ligjit për pushtetin vendor, bashkërendimi që kërkohet nga qeveria qendrore dhe bashkitë për të imponuar respektimin e rregullave të qarkullimit rrugor dhe të bashkëjetesës qytetare kërkon një bashkëpunim shumë më të ngushtë”.
Sipas tij Policia e Shtetit, ajo Rrugore edhe Policia Bashkiake kanë axhendë të njëjtë sa i takon rregullave të qarkullimit rrugor.
Në mënyrë të veçantë, Tahiri foli për parkimet në Tiranë.
“Është problem për të gjithë besoj (jo vetëm për drejtuesit e mjeteve por për qytetarët) që kemi një qytet që të krijon ndjenjën e kaosit vetëm duke parë parkimet dyshe. Dhe kjo nuk mund të vazhdojë, pavarësisht se është një betejë konstante me të gjithë ata që (qoftë dhe për 5’) lenë makinën të parkuar dysh”, tha Tahiri.
I pyetur mbi sugjerimet e Komisionit të Venecias mbi Byronë e Hetimit ministri Tahiri nuk iu përgjigj interesimit të gazetarëve, por nënvizoi rolin e Policisë Rrugore dhe shërbimeve që ofrohen për qytetarët.
