Proçedohet penalisht dhe shpallet në kërkim punonjësi i zyrës së Gjendjes Civile në Kurbin për veprat penale “Korrupsioni pasiv i personave që ushtrojnë funksione publike” “Shpërdorimi i detyrës” dhe “Falsifikim i akteve të gjendjes civile”.
Nga Specialistët e Sektorit Kundër Krimit Financiar në Drejtorinë Vendore të Policisë Lezhë, janë filluar hetimet kryesisht pas publikimit në televizionin Top Channel, në emisionin investigativ “FIKS FARE”, të disa veprime korruptive të një punonjësi të zyrës së Gjendjes Civile në Kurbin.
Është shpallur në kërkim dhe punohet për kapjen e tij:
- Sami Xhetani , 53 vjeç, banues në Mamurras, Kurbin, me detyrë punonjës i zyrës së Gjendjes Civile në Kurbin
Sami Xhetani me detyrë përgjegjës i zyrës së Gjendjes Civile të rrethit Kurbin në këmbim të një shume parash prej 40.000 lekë të reja ka kryer veprime korruptive duke falsifikuar gjeneralitetet në çertifikatën e shtetasit A.L.
Shpallja në kërkim për këtë shtetas u krye për konsumim të elementëve të veprave penale “Korrupsioni pasiv i personave që ushtrojnë funksione publike” “Shpërdorimi i detyrës” dhe “Falsifikimi i akteve të gjendjes civile” parashikuar nga nenet 259, 248 dhe 191.
Veprimet proceduriale janë ndjekur në bashkëpunim me Prokurorinë e Rrethit Gjyqësor Kurbin.
Policia e Shtetit fton mediat të denoncojnë çdo rast korruptiv apo aferë, duke garantuar se do t’i ndjekë në kohë dhe me seriozitet denoncimet duke vënë para përgjegjësisë çdo shkelës të ligjit.
