Aleanca për Ardhmërinë e Kosovës përmes një komunikate ka thënë se protestat e opozitës së bashkuar do të jenë “ditë e natë” deri në dorëheqjen e Qeverisë.
“Opozita e bashkuar prej sot ka filluar një etapë të re të kundërshtimit të qeverisjes së keqe në vend. Protestat do të jenë ‘ditë e natë’ deri në dorëheqjen e kësaj Qeverie”, thuhet në komunikatë e AAK-së.
AAK-ja ka thënë se përmes tyre do të shprehet kundërshtimi i plotë politik e qytetar. Këto protesta do të jenë paqësore dhe mesazhi më i fuqishëm për largimin e kësaj Qeverie antikushtetuese, është masoviteti dhe qëndrueshmëria, e cila do të rritet përditë dhe nga të gjitha anët e Kosovës.
Sipas AAK-së nga sot Kosova po zgjohet. “Ftojmë të gjithë qytetarët, pa dallime politike, etnike, religjioze dhe kulturore, që t’i bashkohen zërit kundër kësaj Qeverie”, thuhet në njoftimin e AAK’së.
Fillon ngritja e tendave
Aktivistët e partive opozitare kanë filluar që të vendosin tendat në sheshin “Skënderbeu” në qendër të Prishtinës.
Ata kanë marrë me vete të gjitha pajisjet dhe nga fotografitë që shihen me vete kanë marrë edhe batanije, sfungjerë dhe jorganë.
Nga kjo nënkuptohet se aktivistët që do të qëndrojnë nëpër tenda, aty do ta bëjnë edhe gjumin.
.jpg)
