Autoritetet afgane deklaruan këtë të mërkurë, 10 qershor, se Pakistani ka kryer sulme të reja ajrore brenda territorit të Afganistanit, duke shkaktuar vdekjen e të paktën 13 personave dhe plagosjen e 14 të tjerëve.
Sipas zëdhënësit kryesor të talebanëve, Zabihullah Mujahid, sulmet goditën provincat Khost, Kunar dhe Paktika. Ai tha se mes viktimave ndodhen 11 fëmijë, një grua dhe një i moshuar.
Sulmet erdhën vetëm një ditë pasi militantë të dyshuar të Tehrik-e-Taliban Pakistan (TTP), të njohur si talibanët pakistanezë, sulmuan një post sigurie në zonën Hasan Khel, në provincën Khyber Pakhtunkhwa, pranë kufirit me Afganistanin.
Sulmi shkaktoi një përplasje të armatosur mes militantëve dhe forcave pakistaneze, ku humbën jetën gjashtë anëtarë të Forcës Federale të Sigurisë, ndërsa disa të tjerë mbetën të plagosur.
Autoritetet pakistaneze njoftuan se forcat e sigurisë arritën të vrisnin tetë nga sulmuesit dhe të pengonin marrjen nën kontroll të postbllokut.
Ministri i Brendshëm i Pakistanit, Mohsin Naqvi, mori pjesë në ceremoninë mortore të efektivëve të vrarë dhe deklaroi se sakrifica e tyre nuk do të harrohet. Ai theksoi gjithashtu se Pakistani do të intensifikojë operacionet kundër grupeve militante që kërcënojnë sigurinë e vendit.
Përshkallëzimi i konfliktit
Përplasjet mes Pakistanit dhe Afganistanit janë përshkallëzuar ndjeshëm që nga fundi i muajit shkurt.
Atëherë, Afganistani kreu një sulm përtej kufirit ndaj Pakistanit, duke pretenduar se ishte një kundërpërgjigje ndaj bombardimeve pakistaneze në territorin afgan. Ndërkohë, Pakistani deklaroi se ndodhej në një “luftë të hapur” me Afganistanin, pas shtimit të sulmeve të militantëve ndaj civilëve dhe forcave të sigurisë brenda Pakistanit.
Nga ana tjetër, Afganistani ka akuzuar Pakistanin se në muajin mars bombardoi një qendër rehabilitimi për përdoruesit e drogës në Kabul, ku sipas autoriteteve afgane humbën jetën më shumë se 400 persona.
Pakistani i ka mohuar këto akuza, duke deklaruar se objektivi i sulmit ishte një depo municionesh dhe jo civilët.
Përpjekjet për uljen e tensioneve
Zhvillimet e fundit ndodhin disa muaj pasi Kina ndërmjetësoi bisedime mes Afganistanit dhe Pakistanit në qytetin Urumqi. Pas takimeve, Pekini njoftoi se të dy vendet ishin dakord të shmangnin përshkallëzimin e konfliktit dhe të kërkonin një zgjidhje diplomatike.
Pakistani vazhdon të akuzojë Afganistanin se strehon militantë që kryejnë sulme brenda territorit pakistanez, veçanërisht anëtarët e TTP-së.
Ky grup është i ndarë nga talebanët afganë, por konsiderohet aleat i tyre. Talebanët kanë qeverisur Afganistanin që nga viti 2021, kur rimorën pushtetin pas tërheqjes së forcave të udhëhequra nga Shtetet e Bashkuara. Autoritetet në Kabul i hedhin poshtë vazhdimisht akuzat e Pakistanit se strehojnë militantë në territorin afgan.
