13 persona janë vënë nën prangat e policisë italiane dhe asete me vlerën e 100 milionë eurove janë sekuestruar në kuadër të një hetimi të drejtuar nga BE ndaj një grupi ndërkombëtar kriminal të akuzuar për mashtrim me taksat në tregtinë e produkteve plastike.
Në operacion u përfshinë edhe autoritete të zbatimit të ligjit të Belgjikës, Hungarisë, Estonisë dhe Sllovakisë.
Në një deklaratë për shtyp të zyrës së prokurorit të pavarur europian në Itali, gjatë hetimit u zbulua një rrjet kriminal i ndërlikuar me lidhje ndërkombëtare, me seli në krahinën italiane të Kampanias, në të cilën gjithashtu ka origjinën organizata mafioze “Kamarra”.
Provat treguan se nga viti 2018 deri në 2023-ën, të dyshuarit kanë lëshuar dhe përdorur fatura të transaksioneve joeksistente me një vlerë totale prej 500 milionë euro, që rezultoi në evazion fiskal me shifrën e 100 milionë eurove, shkruhet në deklaratë.
Në skemë u përfshi një rrjet kompanish guaskë që vepronin si ndërmjetës në shitjen e produkteve të industrisë së plastikës, të cilët nuk kishin deklaruar të ardhurat me synim shmangien e taksës mbi vlerën e shtuar.
Të dyshuarit ndërkohë shisnin produktet me çmime nën vlerën e tregut.
Ndaj gjashtë prej 13 personave që u ndaluan, është caktuar masa e sigurisë “arrest me burg”, ndërsa ndaj shtatë të tjerëve ajo e “arrestit shtëpie”. Nën hetim për këtë çështje janë 52 individë.
