Ditën e sotme u prezantuan për herë të parë gjetjet dhe rezultatet e Programit të Kontrollit Mjekësor Bazë 40-65 vjeç, në Konferencën me temë“Aksesi universal në shërbime dhe mjekësia e familjes: Sëmundjet kronike në fokus”.
Në konferencën e organizuar në ambienet e kompleksit “Xibraku” ishin të pranishëm Ministri i Shëndetësisë Ilir Beqaj, zv.ministrja e Shëndetësisë njëkohësisht drejtore e komanduar e FSDKSH, Milva Ekonomi, si dhe drejtues të shërbimeve univeristare, mjekë familje etj.
Nga të dhënat e para rezulton se rreth 12% e personave që kanë kryer analizat e kontrollit mjekësor bazë, kanë hipertension dhe nuk e kanë ditur më herët që vuajnë nga kjo sëmundje. Ndërsa 4% rezultojnë diabetikë pa e ditur dhe 12.5% paradiabetikë. Kontrolli mjekësor bazë ka pikërisht këtë synim, diagnostikimin në stade të hershme të sëmundjeve.
“Pjesa me e madhe e personave që kanë kryer kontrollin mjekësor bazë janë gra dhe grupmosha më frekuente është ajo 55-65 vjeç”, u shpreh ministri Beqaj, gjatë fjalës së tij.
