Kur në mars u vendos si praktikë që deputetët diskutimin dhe miratimin e ligjeve ta bënin online, qëllimi ishte shmangia e grumbullimeve në sallat e komisioneve.
Por mesa duket ethet e fushatës janë më të forta se ato të Covid-19. Monika Kryemadhi, kryetarja e LSI-së, kundërshtare e fortë e maskës si masë mbrojtëse nga virusi, u gjobit 2 herë për mosmbajtjen e saj teksa zhvillonte takimet elektorale.
Kryetari i Bashkisë Erion Veliaj, pavarsisht pandemisë , shfaqej pa maskë në takimet e tij deri sa u infektua. Vonë por ndryshe nga Kryemadhi, sipas kryeministrit u vetëkorigjua.
Pamjet tregojnë se takimet elektorale zhvillohen në ambiente të mbyllura, pa distancë sociale dhe ndonjeherë pa maska.
Ministra e deputetë aktivë në fushatën e parakohshme si Balluku, Klosi, Gjiknuri, Gjylameti, Hajdari e të tjerë rezultuan pozitivë ndaj Covid.
Aktualisht janë 12 deputetë Covid pozitivë në Kuvendin e Shqipërisë. Dy prej tyre po mjekohen në Turqi. Pyetja që ngrihet është sesa sa qytetarë kanë takuar?
